Əbu-Dabi əmirliyi ərazisində fəaliyyət göstərən bütün hotellər və hotel tipli mənzillər üçün yeni "BƏƏ qonaqpərvərlik standartları"nı rəsmən təqdim edib. ArabAZ xəbər verir ki, ölkəyə gələn turistlərin təcrübəsinə yerli mədəniyyət və ənənələri aşılamaq məqsədi daşıyan bu standartların tam tətbiqinə 2027-ci ilin birinci rübündən etibarən başlanacaq.
Əbu-Dabi Mədəniyyət və Turizm Departamenti (DCT Abu Dhabi) bildirib ki, yeni sistem qonağın qarşılanmasından yola salınmasınadək keçdiyi səkkiz mərhələni əhatə edən 65 fərqli meyardan ibarətdir. Bu mexanizmin əsas məqsədi qonaqların qaldıqları müddətdə BƏƏ-nin özünəməxsus qonaqpərvərlik elementlərini birbaşa hiss etmələrini təmin etməkdir.
Qaydalar çərçivəsində qonaqlara ənənəvi ərəb qəhvəsi və xurmasının təqdim olunması, yerli inqrediyentlərlə hazırlanan milli yeməklərin təklif edilməsi, eləcə də hotellərin dizayn və tərtibatında BƏƏ-nin tarixi və mədəni irsinin əks etdirilməsi yer alır.
Eyni zamanda tələblər sırasına hotellər üçün icbari öhdəliklər daxil edilib; bunlara qeydiyyat şöbəsinin (resepsiya) və müştəri xidmətləri personalının ölkənin tarixi, irsi və milli mədəniyyəti üzrə xüsusi təlimlərdən keçməsi tələbi aiddir.
Təşəbbüs Əbu-Dabinin turizm və qonaqpərvərlik sektorunda BƏƏ-nin milli kimliyini gücləndirməyi hədəfləyir və "BƏƏ Milli Kimlik Strategiyası" ilə tam uzlaşır.
Sözügedən standartlar Milli Layihələr Ofisi ilə əməkdaşlıq şəraitində, həmçinin Federal Milli Şuranın "BƏƏ İnsan Resurslarının və Cəmiyyətinin Gücləndirilməsi üzrə Milli Kimlik Komitəsi"nin dəstəyi ilə hazırlanıb.
Bu təşəbbüs eyni zamanda qonaqlara əmirliyin köklü mədəniyyətinə və ənənələrinə əsaslanan fərqli təəssürat bəxş etməklə "Əbu-Dabi Turizm Strategiyası 2030"un hədəflərini reallaşdırmağa xidmət edir.
Strategiyanın məqsədi Əbu-Dabinin qlobal aparıcı turizm məkanı kimi mövqeyini möhkəmləndirmək, eyni zamanda əmirlikdəki sürətli turizm inkişafının yerli mədəni kimlik və tarixi irslə sıx bağlı qalmasını təmin etməkdir.
