Səudiyyə Ərəbistanının Mülki Müdafiə İdarəsi ölkənin cənub-qərbində yerləşən Əbha, Xamis Müşeyt, Cizan və Nəcran şəhərlərində potensial təhlükə ilə bağlı xəbərdarlıq elan edib.
ArabAZ xəbər verir ki,xəbərdarlıqlar milli erkən xəbərdarlıq sistemi vasitəsilə sakinlərə göndərilib. Bir müddət sonra Mülki Müdafiə İdarəsi Əbha, Xamis Müşeyt, Cizan və Nəcran şəhərlərində təhlükənin aradan qalxdığını açıqlayıb.
Qurum xəbərdarlıqların hansı konkret təhlükə ilə bağlı olduğunu açıqlamayıb. Hadisə nəticəsində ölən və ya yaralananlar, eləcə də maddi ziyan barədə məlumat verilməyib.
Bundan əvvəl husilər Səudiyyə Ərəbistanına genişmiqyaslı raket və pilotsuz uçuş aparatı hücumları həyata keçirdiklərini açıqlayıblar. Hücumların Əbha, Nəcran və Cizandakı “Saudi Aramco” obyektlərinə, həmçinin Xamis Müşeyt hava bazasına yönəldiyi bildirilib.
Husilər hücumların Yəmənə endirilən Səudiyyə hava zərbələrinə cavab olduğunu bildiriblər. Səudiyyə hakimiyyəti isə husilərin Əbha, Xamis Müşeyt, Cizan və Nəcrana hücumları nəticəsində aralarında qadın və uşaqların da olduğu ən azı 73 mülki şəxsin yaralandığını açıqlayıb.
