İran Prezidenti Məsud Pezeşkian Yeni Dehlidə Hindistan Prezidenti Draupadi Murmu ilə görüşüb. Tərəflər iki ölkə arasında uzunmüddətli münasibətləri, iqtisadi əməkdaşlığın genişləndirilməsi imkanlarını və Yaxın Şərqdəki vəziyyəti müzakirə ediblər.

ArabAZ xəbər verir ki, Pezeşkian görüş zamanı İran və Hindistanın mövcud imkanlardan daha səmərəli istifadə edərək iqtisadi əlaqələri inkişaf etdirməsinin vacibliyini vurğulayıb.

İran Prezidenti son aylarda ölkəsinin ABŞ və İsrailin hərəkətləri ilə üzləşdiyini bildirərək onları “cinayətkar əməllər” kimi qiymətləndirib. Pezeşkianın sözlərinə görə, İran xalqı bütün imkanları ilə müqavimət göstərib.

“Biz təcavüzkar tərəf deyildik, əksinə, düşmənin təcavüzünə qarşı dayandıq”, – Pezeşkian bildirib.

Hindistan Prezidenti Draupadi Murmu isə ölkəsinin dialoq və diplomatiya yolu ilə davamlı sülhün əldə edilməsinə sadiqliyini bir daha təsdiqləyib.

Görüşdə İran və Hindistan arasındakı uzunmüddətli dostluq əlaqələri də diqqət mərkəzində olub. Liderlər iki ölkə arasındakı güclü mədəni əlaqələrin və xalqlar arasında tarixi münasibətlərin əhəmiyyətini vurğulayıblar.