Bakı, AzerVoice

Sizin Livanı Qəzza kimi məhv olmaqdan xilas etmək imkanınız var.

AzerVoice xəbər verir ki, İsrailin baş naziri Benyamin Netanyahu sosial media hesablarında Livan xalqına videomüraciət edib.

Videomüraciətdə "sizin Livanı Qəzzada olduğu kimi dağıntı və ağrı ilə nəticələnəcək uzun müharibədən xilas etmək imkanınız var. Ölkənizi Hizbullahdan xilas edin və bu müharibə bitsin” deyib.

Livandakı vəziyyətə görə İranı günahlandıran Netanyahu baş verənlərə görə İsrailin deyil, Tehranın məsuliyyət daşıdığını iddia edib.

Netanyahunun bu çağırışları "Livanda vətəndaş müharibəsi başlatmaq istəyir” kimi şərh olunub.

Xatırladaq ki, İsrail ordusu bir həftə əvvəl Livanın cənub-qərbində Hizbullaha qarşı "məhdud" quru əməliyyatına başladığını açıqlamışdı.

Ordudan verilən açıqlamada yeni birliklərin iştirakı ilə Livan əməliyyatında iştirak edən əsgər sayının 15 minə çatdırıldığı bildirilib.

İsrailin üç həftəlik intensiv bombardmanları zamanı Livanda 1400-dən çox insan həyatını itirib, 1,2 milyon insan didərgin düşüb.