BAKI, AzerVoice, Nailə Babazadə
HƏMAS, İsrail Ordusunun Baş Qərargah rəisinin bu gün Qəzza şəhərinin işğal planlarını təsdiqləməyə hazırlaşmasının bölgədə yeni bir soyqırım və kütləvi köç dalğasının başlanğıcı olduğunu bildirib.
AzerVoice xəbər verir ki, açıqlamada qeyd olunub ki, bu plan yüz minlərlə Qəzzə sakini və sığınan mülki şəxslər üçün kütləvi qırğın və məcburi köçürülmə təhlükəsi yaradır. HƏMAS İsrailin bu addımını böyük müharibə cinayəti kimi qiymətləndirib və 22 aydır davam edən soyqırım siyasətinin tərkib hissəsi olduğunu vurğulayıb. ABŞ-ın bu siyasətə dəstək verdiyi də bildirilib.
Təşkilat, beynəlxalq ictimaiyyətin səssizliyinin və hərəkətsizliyinin İsrailin təcavüzkar mövqeyini gücləndirdiyini qeyd edib. Eyni zamanda, “humanitar yardım” adı ilə Qəzzəyə çadır göndərilməsini İsrailin planlarını ört-basdır etməyə yönəlmiş aldatıcı addım adlandırıb. BMT-nin bu cür addımları insan hüquqları baxımından qəbuledilməz hesab etdiyi bildirilib.
HƏMAS əlavə edib ki, Qəzzədə baş verənlər işğal altındakı İordan çayının qərb sahilindəki hücumlar və məskunlaşma siyasəti ilə əlaqəlidir. Bu addımların məqsədi Fələstinliləri torpaqlarından çıxarmaq və müqəddəs məkanları yəhudiləşdirməkdir. İsrailin bu siyasəti “Böyük İsrail” planı ilə bağlıdır və regiondakı digər ölkələri də hədəfə alır.
Təşkilat, Fələstin xalqının və müqavimət qüvvələrinin dəstəklənməsi, həmçinin Ərəb və İslam ölkələrinin İsrailə qarşı konkret addımlar atması çağırışı edib. HƏMAS milli birlik və ümumi müqavimət strategiyasının həyata keçirilməsinin vacibliyini vurğulayıb.
