BAKI, AzerVoice, Səməd Əyyubov
Bu gün İsraildə tələbələr küçələrə çıxaraq girovların azad edilməsini və Qəzza zolağında sülh sazişinin imzalanmasını tələb ediblər.
AzerVoice-un məlumatına görə, onlar yeni tədris ilinə tətil elan etməklə başlayıblar.
Yüzlərlə tələbə ölkənin şimalında yol ayrıcını bağlayaraq İsrail ilə HƏMAS arasında razılaşma əldə olunmasını və Qəzzada saxlanılan girovların azad edilməsini tələb edib. Məlumata əsasən, bəzi tələbələr “Girovlar olmadan təhsil yoxdur” yazılmış plakatlar qaldırıblar.
Bu gün təxminən 2,5 milyon israilli şagird üçün yeni tədris ili başlayıb. Onlarla məktəbli isə Qəzzadakı döyüşlərin davam etməsinə etiraz olaraq dərslərə qatılmayıb.
Tələbələr Təl-Əviv də daxil olmaqla bir sıra məktəblərin girişlərini bağlayıblar. İsrailin mərkəzində 17 məktəbin zərər gördüyü açıqlanıb. Təl-Əvivdəki “Girovlar Meydanı”nda isə təxminən 100 tələbə nümayəndəsi toplaşıb. Qeyd edək ki, bu meydan 2023-cü il oktyabrın 7-dən bəri dəfələrlə yürüş və etiraz aksiyalarına şahidlik edib.
Hazırda HƏMAS-ın saxladığı 48 girovdan təxminən 20-nin hələ də sağ olduğu ehtimal edilir.
