BAKI,VOA, Nailə Babazadə
Səudiyyə Ərəbistanı Müdafiə Nazirliyi gecə yarısından etibarən Krallığın ərazilərini hədəf alan İrana məxsus 51 pilotsuz uçuş aparatının (PUA) qarşısının alındığını və məhv edildiyini elan edib.
VOA xəbər verir ki, Krallığın hava hücumundan müdafiə sistemləri tərəfindən həyata keçirilən bu uğurlu əməliyyat nəticəsində bütün hədəflər havada zərərsizləşdirilib. Müdafiə Nazirliyi ölkənin suverenliyini və mülki əhalinin təhlükəsizliyini qorumaq üçün bütün zəruri tədbirlərin görüldüyünü vurğulayıb.
Xatırladaq ki, İsrail və ABŞ, Tehran və Vaşinqton rəhbərlikləri arasında danışıqlar davam edərkən 28 fevralda İrana hərbi hücum başladıb. İran da İsrail ilə yanaşı, ABŞ bazalarının yerləşdiyi Qətər, Birləşmiş Ərəb Əmirlikləri (BƏƏ) və Bəhreyn başda olmaqla bəzi bölgə ölkələrində müəyyən etdiyi hədəflərə hücumlarla cavab verib. ABŞ-İsrail hücumlarında İran lideri Əli Xamenei ilə yanaşı, çox sayda yüksək rütbəli rəsmi ölüb. İranlı rəsmilərə görə, ABŞ-İsrail hücumlarında ölənlərin sayı 1348-i, yaralıların sayı isə 17 mini keçib.
