BAKI,VOA, Nailə Babazadə
Küveyt Müdafiə Nazirliyinin sözçüsü Saud əl-Atvan ölkənin hava məkanı və təhlükəsizlik vəziyyəti ilə bağlı rəsmi açıqlama yayıb. Məlumata görə, İran tərəfindən ölkəyə yönəlmiş hər hansı hava hücumu və ya yeni bir operativ hadisə son 24 saat ərzində qeydə alınmayıb.
VOA xəbər verir ki, sözçü Atvan sosial media platforması vasitəsilə paylaşdığı bəyanatda bildirib ki, hər hansı yeni insidentin baş verməməsinə baxmayaraq, Küveyt Silahlı Qüvvələri öz vəzifə və məsuliyyətlərini ən yüksək səviyyədə yerinə yetirməyə davam edir. Ordu bölmələri tam döyüş hazırlığı və daimi ehtiyatlılıq rejimində fəaliyyət göstərir.
Nazirlik rəsmisi vurğulayıb ki, ordunun bu cür fasiləsiz hazırlıq vəziyyəti ölkənin milli təhlükəsizliyinin gücləndirilməsinə xidmət edir. Bu tədbirlər həm Küveyt vətəndaşlarının, həm də ölkədə yaşayan bütün sakinlərin təhlükəsizliyinin qorunması məqsədilə icra olunur. Regionda atəşkəs müzakirələrinin getdiyi bir vaxtda Küveytin bu açıqlaması ərazidəki nisbi sabitliyin göstəricisi kimi qiymətləndirilir.
