Bakı Metropoliteninin Nəsimi rayonunda yerləşən yeni stansiyaya “20 Sentyabr” adı verilib. Qərar Azərbaycan Respublikasının Prezidenti İlham Əliyevin təşəbbüsü əsasında qəbul olunub.
ArabAZ xəbər verir ki, Baş nazir Əli Əsədov Bakı Metropoliteninin Cəlil Məmmədquluzadə küçəsi, 194 ünvanında yerləşən yeni stansiyasının “20 Sentyabr” adlandırılması ilə bağlı qərar imzalayıb.
Qərarda 2023-cü il sentyabrın 20-də Azərbaycanın bütün ərazisində dövlət suverenliyinin bərpa olunması nəzərə alınıb. Stansiyanın bu adla adlandırılması həmin tarixi hadisənin əbədiləşdirilməsi məqsədi daşıyır.
Sənədə əsasən, Bakı Şəhər İcra Hakimiyyəti və “Bakı Metropoliteni” Qapalı Səhmdar Cəmiyyəti qərardan irəli gələn məsələlərin həllini təmin etməlidir.
Qeyd edək ki, Prezident İlham Əliyevin 2024-cü il 19 sentyabr tarixli sərəncamı ilə 20 sentyabr Azərbaycanda Dövlət Suverenliyi Günü kimi qeyd edilir.
Bu tarix 2023-cü il sentyabrın 19-20-də keçirilmiş lokal antiterror tədbirlərindən sonra Azərbaycanın bütün ərazisində dövlət suverenliyinin tam bərpası ilə əlaqədar xüsusi əhəmiyyət daşıyır.
