BAKI,VOA
Okkultizm və demonologiya tarixi əsrlər boyu müxtəlif simvollar və mistik fiqurlarla zəngin olub. Bu sahədə ən çox adıçəkilən və həm qədim sənədlərdə, həm də müasir ezoterik təcrübələrdə xüsusi yeri olan varlıqlardan biri də Marbasdır (və ya digər adı ilə Barbas). Tarixi mənbələrdə "Cəhənnəmin Böyük kralı" olaraq xarakterizə edilən bu fiqur, otuz altı demon legionunu idarə edən qüdrətli bir qüvvə kimi təsvir olunur.
Tarixi mənbələrdə Marbas obrazı
Marbas haqqında ən erkən və mötəbər məlumatlara orta əsrlər və intibah dövrünün məşhur okkultizm kitablarında rast gəlinir. Niderlandlı tədqiqatçı İohann Veyerin 1577-ci ildə işıq üzü görən "Pseudomonarchia daemonum" (Demonların yalançı monarxiyası) adlı əsərində onun qüdrətli bir şir cildində peyda olduğu, lakin onu çaöıranın əmri ilə insan bənzərinə girdiyi qeyd edilir. Mətndə onun gizli qalan sirləri açdığı, xəstəliklər gətirdiyi və eyni zamanda onları sağaltdığı, mexanika sənəti və müdriklik bəxş etdiyi vurğulanır.
XVII əsrə aid edilən və anonim müəllif tərəfindən yazılmış məşhur "Lemegeton clavicula Salomonis" ("Süleymanın kiçik açarı") kitabının birinci hissəsi olan "Ars Goetia"da da Marbas 72 əsas demon arasında beşinci sırada yer alır. 1904-cü ildə britaniyalı okkultist Alister Krouli tərəfindən yenidən nəşr edilən bu mətndə onun insanları fərqli formalara salmaq (metamorfoza) gücünə malik olduğu təsdiqlənir. Eyni təsvirlərə XIX əsrin məşhur fransız mənbəsi "Dictionnaire infernal" əsərində də rast gəlinir.
Müasir ezoterik yanaşma və rituallar
Müasir demonologiya ilə məşğul olanlar tarixi mətnlərlə yanaşı şəxsi təcrübələrə də əsaslanırlar. Ezoterik mühitdə onun tituluna xüsusi hörmətlə yanaşılır və o, "Kral Marbas" olaraq adlandırılır. İnanc sferasında onun enerjisi rəsmiyyətdən uzaq, isti və dostyana kimi xarakterizə olunsa da, eyni zamanda onun son dərəcə güclü və verilən sözlərə qarşı tələbkar olduğu bildirilir.
Müasir praktiklər Marbas ilə işləyərkən bəzi spesifik qaydalara riayət edirlər:
O, gündüz demonu hesab olunur və onunla əlaqə qurmaq üçün ən uyğun vaxt çərşənbə gününün gündüz saatları sayılır.
Tarixi mətnlərdə xəstəlik gətirmək gücü vurğulansa da, müasir inanclarda onun sağaltma prosesində müasir tibb vasitələrindən istifadə etdiyi, məsələn, xəstələrin lazımi mütəxəssis həkimlərə çıxışını asanlaşdırdığı iddia edilir.
Ənənəvi rituallarda ona çobanyastığı, darçın, bal, lavanda, flüorit daşı və şir simvollu əşyalar təqdim olunur.
Müraciət ayinlərində onun gizli simvolu çəkilərək şam işığında yandırılır. Ezoterik mütəxəssislər xəbərdarlıq edirlər ki, simvolu ətrafındakı qoruyucu dairələr (möhür) olmadan çəkmək lazımdır, çünki tam möhür varlığı tələyə salmaq məqsədi daşıyır və bu, qarşılıqlı hörmət prinsipinə ziddir. Barbas və ya Barbus adlı digər demonun Marbas ilə eyni varlıq olub-olmaması məsələsi isə müasir okkultizmdə hələ də müzakirə mövzusu olaraq qalır.
