BAKI, AzerVoice
Cənubi Koreyada növbədənkənar prezident seçkiləri keçirilir.
AzerVoice xəbər verir ki, Cənubi Koreyada impiçmentlə vəzifəsindən kənarlaşdırılan prezident Yoon Suk Yeolun yerinə yeni dövlət başçısının seçilməsi üçün bu gün ölkə üzrə səsvermə başlayıb.
Seçkilərdə 5 namizəd mübarizə aparır. Əsas rəqabət Demokratik Partiyanın namizədi Li Jae-Mung ilə hakim Xalq Gücü Partiyasının nümayəndəsi Kim Mun Su arasında gedir. Yeni İslahatlar Partiyasından Li Jun Seok, Demokratik İşçi Partiyasından Kvon Yanq-quk və müstəqil Sonq Cin Ho da prezidentliyə namizədlər sırasındadır.
Sorğulara əsasən, Li Jae-Mung bu seçkilərdə favorit sayılır. O, 2022-ci ildə keçirilən prezident seçkilərində Yoon Suk Yeola cəmi 0,7 faiz fərqlə uduzmuşdu. Bu dəfə isə son rəy sorğularında Li rəqibi Kimi təxminən 10 faiz bəndi qabaqlayır.
Səsvermə yerli vaxtla saat 20:00-da başa çatacaq. Qeyri-rəsmi nəticələrin gecə yarısına qədər bəlli olacağı gözlənilir. Rəsmi nəticələr isə sabah Milli Seçki Komissiyasının iclasında açıqlanacaq.
Qeyd edək ki, seçkilər Yoon Suk Yeolun impiçmenti ilə əlaqədar keçirilir. Yeni prezident sabah Milli Məclisdə keçiriləcək andiçmə mərasimindən dərhal sonra vəzifəsinin icrasına başlayacaq.
Xatırladaq ki, 2024-cü il dekabrın 3-də prezident Yoon müxalifəti “dövlət əleyhinə fəaliyyət”də ittiham edərək hərbi vəziyyət elan etmişdi. Bu qərar parlament və Nazirlər Kabineti tərəfindən rədd olunduqdan sonra geri çəkilmişdi. Dekabrın 14-də Milli Assambleyada impiçment qərarı qəbul edilmiş və Yoonun səlahiyyətləri dayandırılmışdı. Aprelin 4-də isə Konstitusiya Məhkəməsi bu qərarı qüvvədə saxlayaraq onun vəzifədən kənarlaşdırılmasına hökm vermişdi. Məhkəmə yeni prezidentin seçilməsi üçün 60 gün ərzində növbədənkənar seçkilərin keçirilməsini qərara almış və seçki tarixi iyunun 3-nə təyin edilmişdi.
