BAKI, AzerVoice
ABŞ-ın İranın Fordo şəhərində yerləşən yeraltı nüvə obyektinə endirdiyi hava hücumundan sonra əldə edilən yeni peyk görüntüləri bölgədə genişmiqyaslı bərpa işlərinin aparıldığını göstərir.
AzerVoice xəbər verir ki, Pentaqonun dəstəklədiyi Maxar Technologies şirkəti tərəfindən yayımlanan görüntülərdə, iranlı inşaat qruplarının zədələnmiş ərazidə fəal şəkildə işlədiyi müşahidə olunur.
ABŞ tərəfindən bunker buster tipli GBU-57 bombaları ilə həyata keçirilən zərbələrdən sonra Fordo nüvə obyektində kraterlər və səthi deformasiyalar yaranıb. Peyk fotolarında ekskavatorlar, buldozerlər və digər ağır texnikalar vasitəsilə həm təmir, həm də yeni yolların çəkilişi aparılır.
Beynəlxalq Atom Enerjisi Agentliyinin (MAQATE) baş direktoru Rafael Qrossi bildirib ki, Fordodakı santrifüj qurğular artıq "işlək vəziyyətdə deyil".
MAQATE-nın ilkin dəyərləndirməsinə görə, hücumdan sonra hər hansı radiasiya sızıntısı və ya nüvə təhlükəsi qeydə alınmayıb. Lakin hücumun İranın nüvə proqramını nə qədər geri saldığı hələ dəqiq açıqlanmayıb.
ABŞ Prezidenti Donald Tramp çıxışında Fordo ilə yanaşı Natanz və İsfahan nüvə obyektlərinin də “illərlə geriyə salındığını” iddia edib. O, ABŞ Müdafiə Kəşfiyyat İdarəsindən (DIA) sızan və hücumların effektivliyinə dair “aşağı etibarlılıqlı” ilkin hesabatı da sərt tənqid edib.
Sözügedən hesabatın sızması Vaşinqtonda ciddi rezonans doğurub. Mərkəzi Kəşfiyyat İdarəsinin (CIA) direktoru Con Radklif və Milli Kəşfiyyat direktoru Tulsi Qabbard Trampın mövqeyini dəstəkləyərək, hücumların İran obyektlərinə “ağır ziyan vurduğunu” təsdiqləyiblər.
İran dövlət mediası iddia edir ki, hücumdan əvvəl Fordodakı zənginləşdirilmiş uran ehtiyatları təhlükəsiz zonalara daşınıb və obyektlər boşaldılıb. ABŞ mediası isə, xüsusilə Newsweek nəşri bu informasiyaların hələ də təsdiqlənmədiyini bildirir.
Müşahidəçilər qeyd edirlər ki, yayımlanan yeni peyk görüntüləri İranın hücumdan əvvəl ehtiyat tədbirləri görmüş ola biləcəyini göstərsə də, nüvə proqramına ciddi zərbə vurulduğunu istisna etmək olmaz.
