BAKI, AzerVoice
İtaliya hökuməti ABŞ ilə rüsum mövzusunda bərabərhüquqlu razılaşmaya nail olunacağına ümid edir və ABŞ-ı ticarət qarşıdurmasından yayınmağa çağırır.
AzerVoice xəbər verir ki, bu barədə İtaliyanın Baş naziri Corcia Meloninin mətbuat xidməti tərəfindən yayımlanan bəyanatda bildirilib.
“Bütün tərəflərin xoşniyyətinə ümid edirik ki, bu, Qərbi gücləndirəcək bərabərhüquqlu bir razılaşmaya gətirib çıxarsın. Xüsusilə indiki şəraitdə Atlantikanın iki sahili arasında ticarət qarşıdurması yaratmağın heç bir mənası yoxdur” – deyə, bəyanatda vurğulanıb.
Xatırladaq ki, ABŞ prezidenti Donald Tramp daha əvvəl “Truth Social” platformasında Avropa Komissiyası rəhbərinə ünvanladığı məktubu paylaşaraq bildirmişdi ki, avqustun 1-dən etibarən ABŞ Avropa İttifaqından (Aİ) idxal edilən mallara 30 faizlik gömrük rüsumları tətbiq edəcək. Məktubda yeni tariflərin hal-hazırda Aİ məhsullarına tətbiq edilən 10 faizlik sektoral rüsumlardan ayrıca olacağı qeyd olunurdu.
Avropa Komissiyası isə bəyan edib ki, bu cür tariflər Avropa ixracatını ciddi şəkildə sarsıdacaq və əsas transatlantik təchizat zəncirlərini pozacaq. Komissiyanın mətbuat xidməti tərəfindən yayımlanan bəyanatda vurğulanıb ki, avqustun 1-dək Aİ ABŞ ilə razılaşmaya nail olmaq üçün səylərini davam etdirəcək, eyni zamanda mümkün cavab tədbirlərini də hazırlayır.
Qeuyd edək ki, Meloni, Tramp ilə imtiyazlı münasibətlər qurmağa çalışsa da, müxalifət onun ABŞ prezidentinin qərarlarına təsir edə bilməməsini tənqid edib. Öz növbəsində Roma bildirir ki, Aİ adından ticarət danışıqları aparmaq səlahiyyəti yalnız Avropa Komissiyasına aiddir. Meloni isə 10 faizlik tariflərin qəbul edilə biləcəyini istisna etməmişdi.
