BAKI, AzerVoice
BMT-nin Humanitar Məsələlərin Koordinasiya Ofisinin Fövqəladə Yardım Koordinatoru Tom Fletçer Qəzza zolağına humanitar yardımların daxil olmasına şərait yaratmaq üçün elan olunan atəşkəs qərarını alqışladığını bildirib.
AzerVoice xəbər verir ki, bu barədə Fletçer “X” sosial şəbəkəsində yazıb.
“Qəzzada aclıq içində olan ailələrə dəstək göstərmək məqsədilə sahə komandalarımızla koordinasiyalı şəkildə çalışırıq və imkanlarımız daxilində hər cür kömək göstərməyə hazırıq” - deyə, o vurğulayıb.
BMT-nin Ərzaq Proqramı da atəşkəsin elan olunmasını və BMT-nin fövqəladə ərzaq yardımı daşıyan karvanlarının hərəkətini asanlaşdırmaq üçün humanitar dəhlizlərin yaradılmasını müsbət qarşıladığını bildirib.
Qurumun açıqlamasına görə, mövcud ərzaq ehtiyatları Qəzza sakinlərinin təxminən üç aylıq tələbatını qarşılayacaq səviyyədədir. Bildirilib ki, görüləcək yeni tədbirlər aclıqla üzləşən insanlara təcili ərzaq yardımının vaxtında çatdırılmasına imkan yaradacaq.
Qurum qeyd edib ki, Qəzza əhalisinin üçdə biri günlərlə yemək tapa bilmir, təxminən 470 min insan aclıq səviyyəsində yaşayır. Eyni zamanda, 90 min qadın və uşaq təcili şəkildə qida yardımına ehtiyac duyur.
Qurum həmçinin vurğulayıb ki, Qəzzanın istənilən bölgəsində yaşayan mülki əhaliyə humanitar yardımın fasiləsiz çatdırılmasının yeganə yolu razılaşdırılmış atəşkəsin əldə olunmasından keçir.
Qeyd edək ki, İsrail ordusu ötən gecə Qəzzaya humanitar yardımların havadan çatdırılmasının bərpa olunduğunu və BMT karvanlarının ərzaq və dərman daşımaları üçün təhlükəsiz keçid dəhlizlərinin yaradıldığını açıqlayıb.
