BAKI, AzerVoice, Nərmin Ağayeva
Norveçin 2 trilyon dollarlıq suveren sərvət fondu İsraildəki 11 şirkətdəki paylarını geri götürdüyünü və investisiyalarının idarəçiliyini daxili menecerlərə verdiyini açıqlayıb.
AzerVoice xəbər verir ki, bu qərar Qəzza və İordan çayının qərb sahilindəki vəziyyətlə bağlı mediada yayılan məlumatlar və fondun İsrailin müdafiə sənayesində fəaliyyət göstərən şirkətlərə sərmayə qoyması barədə təcili araşdırma nəticəsində qəbul edilib.
Norveç maliyyə naziri Yens Stoltenberq fondun İsrailə olan investisiyalarının yenidən nəzərdən keçirilməsinin davam etdiyini bildirib. Fondun iyunun 30-na olan məlumatına görə, o, 61 İsrail şirkətində paya sahib olub, lakin son zamanlarda 11 şirkətdəki səhmlərindən əl çəkib. Hələlik həmin şirkətlərin adları açıqlanmayıb.
Fond bildirib ki, bundan sonra yalnız birja indeksinə daxil olan və şərtlərə cavab verən şirkətlərə investisiya qoyacaq, lakin indeksdə olan hər şirkətə mütləq sərmayə qoyulmayacaq.
Qeyd edək ki, Norveç parlamenti iyun ayında fondun işğal olunmuş Fələstin ərazilərində fəaliyyət göstərən bütün şirkətlərdən ayrılması təklifini rədd etmişdi. Fond həmçinin ötən il İsrailin bir enerji şirkətindəki paylarını satıb.
