BAKI, AzerVoice, Səməd Əyyubov
Böyük Britaniya və 21 beynəlxalq tərəfdaş İsrailin Fələstin torpaqlarındakı işğalı dərinləşdirəcək “E1 layihəsi”nə verdiyi təsdiqi kəskin şəkildə pisləyib və bu qərarın dərhal ləğv edilməsinə çağırış edib.
AzerVoice xəbər verir ki, bu barədə Böyük Britaniya, Kanada və Avropa İttifaqının da daxil olduğu 22 tərəfdaş ölkə birgə bəyanat yayıb.
Bəyanatda qeyd olunur ki, İsrailin Planlaşdırma Komitəsinin Şərqi Qüdsdə yerləşən E1 bölgəsində yeni yaşayış məntəqələrinin tikintisini təsdiqləməsi qəbuledilməzdir və beynəlxalq hüququn pozulması kimi qiymətləndirilməlidir. Qərarın dərhal geri çəkilməsi tələb olunub.
Sənəddə həmçinin İsrailin ifrat sağçı maliyyə naziri Betsalel Smotriçin açıqlamalarına istinad edilərək bildirilib ki, bu plan Fələstin dövlətinin ərazi bütövlüyünü parçalayacaq, fələstinlilərin Qüdsə çıxış imkanlarını məhdudlaşdıracaq və iki dövlətli həll perspektivini mümkünsüz edəcək.
Bəyanatda vurğulanıb: “Bu addım İsrail xalqına heç bir fayda gətirməyəcək. Əksinə, təhlükəsizliyi zəiflətmək, zorakılığı və qeyri-sabitliyi artırmaq riski daşıyır, bizi sülhdən daha da uzaqlaşdırır. İsrail hökumətinin E1 planını daha da irəli aparmasının qarşısını almaq üçün hələ də imkan var. Biz onları bu planı təcili şəkildə geri çəkməyə çağırırıq. İsrailin birtərəfli addımları Yaxın Şərqdə təhlükəsizlik və rifaha dair ortaq arzularımızı zədələyir. İsrail hökuməti BMT Təhlükəsizlik Şurasının 2334 saylı qətnaməsinə uyğun olaraq bütün məskunlaşma fəaliyyətlərinə son qoymalı və Fələstin rəhbərliyinin maliyyə resurslarına tətbiq olunan məhdudiyyətləri aradan qaldırmalıdır.”
Birgə bəyanata Avstraliya, Belçika, Kanada, Danimarka, Estoniya, Finlandiya, Fransa, İslandiya, İrlandiya, İtaliya, Yaponiya, Latviya, Litva, Lüksemburq, Niderland, Norveç, Portuqaliya, Sloveniya, İspaniya, İsveç, Böyük Britaniya xarici işlər nazirləri və Avropa İttifaqının Xarici Siyasət və Təhlükəsizlik üzrə Ali Nümayəndəsi Kaya Kallas imza atıb.
