BAKI, AzerVoice, Nərmin Ağayeva

Yunanıstanın əsas müxalifət partiyası PASOK-un lideri Nikos Andrulakis parlament sədri Nikitas Kaklamanisə məktub göndərərək, Qəzzadakı vəziyyətin müzakirəsi üçün parlamentin iclasını Fələstinə yönəltməyi tələb edib.

AzerVoice xəbər verir ki, Yunanıstanın dövlət televiziyasına istinadən, Andrulakis məktubunda Qəzzada 2023-cü ilin oktyabrından bəri on minlərlə insanın həyatını itirdiyini vurğulayaraq, İsrailin baş naziri Benyamin Netanyahunun açıqlamalarına istinadən Qəzza zolağında etnik təmizləmə məqsədi daşıyan əməliyyatlar iddiası irəli sürüb.

O, “Bu, BMT və Avropa Birliyinin tərifinə görə etnik təmizləmə aktıdır,” - deyə qeyd edib.

Andrulakis, Fələstində iki dövlətli həllin dinc yanaşı yaşamaq üçün yeganə yol olduğunu vurğulayaraq, Yunanıstan parlamentini 2012-ci il 12 dekabr qətnaməsini təsdiqləməyə və Fələstin məsələsini müzakirə etmək üçün ümumi iclas çağırmağa çağırıb. O, sülh danışıqlarına dərhal başlamaq üçün hər cür səy göstərilməsini tələb edib.

Qeyd edək ki, bu tələb Qəzzada humanitar böhranın dərinləşdiyi və beynəlxalq təzyiqlərin artdığı bir dövrdə səsləndirilib. Andrulakisin təşəbbüsü, Yunanıstanın Fələstin məsələsinə dəstəyini gücləndirmək və beynəlxalq ictimaiyyətin diqqətini bu məsələyə cəlb etmək məqsədi daşıyır.