BAKI, AzerVoice
Omanın Energetika və Faydalı Qazıntılar Nazirliyi dörd konsessiya sahəsi üzrə investisiya imkanlarını açıqlayıb.
AzerVoice xəbər verir ki, bildirilib ki, yerli və beynəlxalq şirkətlər 2025-ci ildə faydalı qazıntıların hasilatı üçün keçiriləcək tenderlərdə iştirak edə biləcəklər.
Nazirliyin məlumatına görə, addım ölkənin “Oman 2040 Vizyonu” çərçivəsində mədən sektoruna yatırımların artırılması və sahənin milli iqtisadiyyata töhfəsinin böyüdülməsi strategiyasının bir hissəsidir. İlkin geoloji araşdırmalar konsessiya ərazilərində mis, qızıl, gümüş və xromitlərlə yanaşı sənaye-tikinti üçün vacib olan bazalt və qabbro ehtiyatlarının mövcudluğuna işarə edir.
Rəsmi açıqlamada konsessiyaların açılmasının iqtisadiyyatın şaxələndirilməsinə, qeyri-neft sektoruna xarici kapitalın cəlbinə və Omanın regionda faydalı qazıntıların hasilatı üzrə mövqelərinin gücləndirilməsinə xidmət etdiyi vurğulanıb. Tenderlərin şərtləri, texniki tələblər və vaxt cədvəlinin ayrıca açıqlanacağı, iştirakçı şirkətlərdən texniki-iqtisadi əsaslandırma və ətraf mühit öhdəliklərinin təqdim olunmasının gözlənildiyi qeyd edilib.
