BAKI,AzerVoice, Fərid Mikayılov
İran ABŞ-ın təzyiq və hədələrinə boyun əyməyəcək.
AzerVoice xəbər verir ki, bu barədə İran İslam İnqilabı Keşikçiləri Korpusunun (SEPAH) sədr müavini, briqada generalı Əhməd Vahidi ABŞ Prezidenti Donald Trampın son bəyanatlarını şərh edərkən bildirib.
Vahidi qeyd edib ki, ABŞ hazırda strateji tənəzzül mərhələsindədir və əvvəllər qlobal üstünlük üçün istifadə etdiyi mexanizmlər effektivliyini itirib. Onun sözlərinə görə, Vaşinqton bu səbəbdən məqsədlərinə çatmaq üçün güc tətbiqi, müharibə, terror və talan siyasətinə üstünlük verir.
SEPAH rəsmisi vurğulayıb ki, suveren bir ölkənin prezidentinin zorla aparılması və ya general Qasım Süleymaninin qətlə yetirilməsi güc nümayişi deyil, əksinə, zəifliyin göstəricisidir.
Vahidi bildirib ki, Süleymaninin mübarizəsinin nəticəsi kimi dəyərləndirilən “Əl-Əqsa Tufanı” əməliyyatı İsrail rejiminin əsl mahiyyətini dünya ictimaiyyətinə göstərib və bu rejim qlobal miqyasda ən çox nifrət edilən aktorlardan birinə çevrilib.
O, düşmənlərin gözləntilərinin əksinə olaraq, Süleymaninin qətlə yetirilməsinin İranı zəiflətmədiyini, əksinə, ölkənin daha da gücləndiyini deyib. Vahidi əlavə edib ki, İran xalqı qorxuya düşməyəcək və ABŞ-ın hegemonluğuna tabe olmayacaq.
SEPAH sədr müavini çıxışının sonunda bildirib ki, möhkəm mövqe və müqavimət İran xalqının gələcəyini təmin edəcək və xarici təhdidlər ölkəni yolundan döndərə bilməyəcək.
