BAKI, AzerVoice, Orxan Qədirzadə

İsrail və Somaliland tərəfləri ikitərəfli münasibətlərin inkişaf etdirilməsi barədə bəyanatla çıxış ediblər.

AzerVoice xəbər verir ki, Somalidən birtərəfli qaydada ayrıldığını elan edən Somaliland regionunun rəhbəri Abdirahman Məhəmməd Abdillahi və İsrailin xarici işlər naziri Gideon Saar Somalilandın mərkəzi Hargeysada birgə mətbuat konfransı keçiriblər.

Somaliland rəhbəri çıxışında İsrail hökumətinə və xalqına regionun müstəqilliyinin tanınmasına görə təşəkkür edib. O bildirib ki, bu qərar diplomatik, iqtisadi və inkişaf sahələrində mühüm nəticələr doğuracaq. Abdillahi qeyd edib ki, İsrailin bu addımı yalnız Somalilend üçan deyil, bütövlükdə Afrika Buynuzu regionu və beynəlxalq ictimaiyyət üçün strateji əhəmiyyət daşıyır.

Onun sözlərinə görə, Somaliland İsraillə ümumi strateji maraqlar əsasında əməkdaşlığın genişləndirilməsində maraqlıdır. Region rəhbəri yaxın zamanda İsrailə səfər edəcəyini və bu ölkədə Somaliland səfirliyinin açılacağını da açıqlayıb. Abdillahi vurğulayıb ki, İsrailin Somalilandi tanıması investisiyalar, ticarət, texnologiya, energetika, su təchizatı, mədən sənayesi, kənd təsərrüfatı və infrastruktur sahələrində geniş imkanlar yaradacaq.

İsrailin xarici işlər naziri Gideon Saar isə bildirib ki, Təl-Əviv Somalilandı tam şəkildə tanımaqdan məmnundur və tərəflər arasında qarşılıqlı faydaya əsaslanan çoxtərəfli və davamlı münasibətlərin qurulmasına hazırdır. Onun sözlərinə görə, İsrail Somalilandı ilk dəfə 26 iyun 1960-cı ildə tanıyıb və bu tanınma 26 dekabr 2025-ci ildə yenidən təsdiqlənib.

Açıqlamada qeyd olunur ki, İsrail xarici işlər nazirinin Somalilanda səfəri son 34 ildə bu səviyyədə həyata keçirilən ilk səfərdir və diplomatik, strateji və təhlükəsizlik baxımından tarixi əhəmiyyət daşıyır. Bu səfər İsrailin 26 dekabr 2025-ci ildə Somalilendin müstəqilliyini tanıması fonunda münasibətlərdə yeni mərhələnin başlanğıcı kimi qiymətləndirilir.

Qeyd edək ki, 26 dekabr 2025-ci ildə İsrailin Baş naziri Benyamin Netanyahu Somalilandı “müstəqil və suveren dövlət” kimi tanıdığını elan edib. Bununla da İsrail Somalilandı tanıyan yeganə dövlət olub. Somaliland 1991-ci ildə Somalidən ayrıldığını bəyan etsə də, indiyədək beynəlxalq ictimaiyyət tərəfindən müstəqil dövlət kimi tanınmayıb.