BAKI,AzerVoice, Fərid Mikayılov
Venesuela hakimiyyəti ölkənin daxili siyasətinə xarici müdaxilələrə qarşı sərt ritorika nümayiş etdirib.
AzerVoice xəbər verir ki, Venesuelanın səlahiyyətli prezidenti Delsi Rodriges Vaşinqtonun Karakas siyasətinə təsir göstərmək cəhdlərini kəskin tənqid edib.
“Venesuelanın siyasəti ilə bağlı Vaşinqtondan verilən göstərişlərə son qoyulmalıdır. Daxili fikir ayrılıqlarımızı və münaqişələrimizi yalnız Venesuela siyasəti həll edə bilər”- deyə Rodriges vurğulayıb.
Nikolas Maduronun siyasi varisi kimi tanınan Rodriges bildirib ki, Venesuela ABŞ-la fikir ayrılıqlarını müstəqil şəkildə həll etməkdən çəkinmir. Onun sözlərinə görə, milli birlik və cəmiyyətin daxili həmrəyliyi ölkənin suverenliyinin təmin olunmasının əsas şərtidir.
Rodriges, həmçinin, daha əvvəl verdiyi açıqlamalarda ABŞ tərəfindən ona qarşı təhdidlərin səsləndirildiyini iddia edib. O, Nikolas Maduro və onun həyat yoldaşının oğurlanmasından sonra Vaşinqtonun əməkdaşlıqdan imtina etdiyi üçün ona qarşı zorakılıq hədələri irəli sürdüyünü qeyd edib.
