BAKI,VOA, Fərid Mikayılov

Emmanuel Makron Cənubi Koreyaya səfəri çərçivəsində çıxışı zamanı bildirib ki, İranın nüvə proqramı ilə bağlı problem hərbi yolla həll edilə bilməz.

VOA xəbər verir ki, o, ABŞ və İsrail tərəfindən həyata keçirilən hücumların bu məsələni həll etməyəcəyini vurğulayaraq diplomatik danışıqlara çağırıb.

Fransa prezidenti qeyd edib ki, əgər diplomatik və texniki danışıqlar üçün çərçivə yaradılmazsa, vəziyyət bir neçə ay və ya il ərzində yenidən kəskinləşə bilər.

Makron həmçinin Hörmüz boğazı ilə bağlı mümkün hərbi əməliyyat planlarına da münasibət bildirib. O, bu cür təşəbbüsləri “realist olmayan” kimi qiymətləndirərək qeyd edib ki, belə bir əməliyyat həm uzun zaman tələb edər, həm də ciddi təhlükələrlə müşayiət olunar.

Onun sözlərinə görə, bu marşrutdan keçid zamanı İran İnqilab Keşikçiləri Korpusu tərəfindən sahil boyu təhlükələr, ballistik raketlər və digər risklər ciddi təhlükə yaradır.