BAKI,VOA,Yusif Şərifzadə

ABŞ Prezidenti Donald Tramp İsrailin Baş naziri Benyamin Netanyahu ilə bağlı narazılığını getdikcə daha açıq şəkildə nümayiş etdirə bilər.

VOA xəbər verir ki, təhlilçinin fikrincə, Tramp ilə Netanyahu arasında keçirilən son danışığın detalları açıqlanmasa da, ABŞ prezidentinin İsrail hökumətinin rəhbərinə münasibətində dəyişiklik hiss olunur.

Mərvan Bişara bildirib ki, müharibənin gedişi Vaşinqtonun gözləntilərinə tam uyğun gəlmir və bu vəziyyət gələcəkdə məsuliyyət məsələsini ön plana çıxara bilər.

“Tədricən belə bir təsəvvür yaranır ki, Donald Tramp müharibənin nəticələrinə görə məsuliyyətin Benyamin Netanyahunun üzərinə düşdüyünü düşünə bilər”, – deyə təhlilçi vurğulayıb.

Onun sözlərinə görə, ABŞ administrasiyası hazırda mürəkkəb seçim qarşısındadır. Bir tərəfdən genişmiqyaslı müharibənin yenidən başlamasını istəmir, digər tərəfdən isə İranı öz şərtləri əsasında razılaşmaya məcbur edə bilmir.

Bişara qeyd edib ki, müharibənin əvvəlində səsləndirilən məqsədlərin bir hissəsi reallaşmayıb.

O bildirib ki, İranın nüvə proqramı və raket potensialı ilə bağlı əvvəllər səsləndirilən hədəflərin tam yerinə yetirildiyini söyləmək mümkün deyil.

Təhlilçinin fikrincə, yaranmış vəziyyət həm Vaşinqtonu, həm də Təl-Əvivi yeni siyasi qərarlar qəbul etməyə məcbur edə bilər.

Mərvan Bişara hesab edir ki, Netanyahu hazırkı mərhələdə daha sərt hərbi yanaşmanın tərəfdarı kimi görünür və bu, tərəflər arasında fikir ayrılıqlarını dərinləşdirə bilər.