BAKI,VOA,Yusif Şərifzadə
İsrailin Baş naziri Benyamin Netanyahu və müdafiə naziri İsrail Kats ordunun Livanın cənubunda atəşi dayandırması barədə göstəriş veriblər.
VOA xəbər verir ki, bu barədə İsrailin 12-ci televiziya kanalı məlumat yayıb.
Məlumata görə, İsrail ordusu Livanın cənubunda atəşi dayandıracaq, lakin nəzarətdə saxladığı ərazilərdən geri çəkilməyəcək.
Bildirilir ki, Benyamin Netanyahu və İsrail Katsın qəbul etdiyi qərar ABŞ ilə koordinasiya şəraitində həyata keçirilib.
Qərarın bölgədə gərginliyin azaldılması və atəşkəs rejiminin qorunmasına yönəldiyi qeyd olunur.
Bu arada Livanın Səhiyyə Nazirliyi İsrailin martın 2-dən etibarən həyata keçirdiyi hücumların nəticələri ilə bağlı yeni məlumat açıqlayıb.
Nazirliyin məlumatına görə, həmin tarixdən bəri azı 4 min 57 nəfər həlak olub, 12 min 121 nəfər yaralanıb.
Rəsmilər bildirirlər ki, ölən və yaralananların böyük əksəriyyəti Livanın cənub bölgələrinin payına düşür.
