BAKI,VOA Orxan Qədirzadə
Kolumbiyanın yeni prezidenti Abelardo de Lasperiya vəzifəsinin ilk günlərində ölkədəki silahlı qruplara qarşı hərbi əməliyyatlara başlayıb. Panama isə qonşu ölkədə artan silahlı qarşıdurmalar fonunda Kolumbiya ilə sərhədində təhlükəsizlik tədbirlərini gücləndirib.
Prezident De Lasperiya bazar günü keçirilən ilk hərbi əməliyyatlar zamanı 6 silahlı üsyançının öldürüldüyünü açıqlayıb. O bildirib ki, əməliyyatlar silahlı qruplara qarşı mübarizədə “aydın və güclü mesaj” xarakteri daşıyır və onların gizlənə biləcəkləri yer qalmayacaq.
Kolumbiya liderinin sözlərinə görə, Meta əyalətində keçirilən əməliyyatda “FARC”ın parçalanmış qruplarından birinin rəhbəri də daxil olmaqla 4 silahlı şəxs öldürülüb. Antioquia əyalətində isə “Clan del Golfo” qruplaşmasının iki üzvü zərərsizləşdirilib.
De Lasperiya andiçmə mərasimində narkotik ticarəti ilə əlaqəli terrorizmə və cinayətkar təşkilatlara qarşı mübarizəni prioritet elan edib. O, silahlı qruplarla dialoq imkanlarının tükəndiyini bildirərək hərbi əməliyyatların intensivləşdiriləcəyini açıqlayıb.
Yeni prezident həmçinin ABŞ və İsrailin dəstəyi ilə üsyançılara və narkotik qaçaqmalçılarına qarşı əməliyyatların gücləndiriləcəyini, eləcə də Salvador modelinə bənzər iri həbsxanaların inşa ediləcəyini vəd edib.
Lakin hökumətin ilk əməliyyatları ilə yanaşı, təhlükəsizlik qüvvələrinə hücumlar da qeydə alınıb. Ölkənin şimalında polis məntəqəsinə partlayıcı maddə ilə yüklənmiş pilotsuz uçuş aparatı ilə hücum nəticəsində bir polis əməkdaşı ölüb.
Panama sərhəddə tədbirləri artırdı
Kolumbiyadakı vəziyyət fonunda Panama da sərhəd təhlükəsizliyini gücləndirib. İki ölkə arasındakı 266 kilometrlik sərhədin böyük hissəsinin yerləşdiyi Darien meşəlik ərazisində əlavə sərhəd qüvvələri yerləşdirilib.
Panama Milli Sərhəd Xidmətinin rəhbəri Larri Solis bildirib ki, tədbirlərin məqsədi sahilləri və sərhəd xəttini nəzarətdə saxlamaq və cinayətkar qrupların qarşısını almaqdır.
Bununla yanaşı, Panama hakimiyyəti “Clan del Golfo” və ya Milli Azadlıq Ordusunun Kolumbiyadan ölkəyə keçməyə hazırlaşması barədə etibarlı məlumatın olmadığını açıqlayıb. Panama rəsmiləri əhali arasında panikanın yaranmaması üçün ehtiyatlı davranmağa çağırıblar.
