BAKI, AzerVoice
Microsoft, İsraillə əməkdaşlığa etiraz edən əməkdaşını işdən azad edib.
AzerVoice xəbər verir ki, “Microsoft” şirkəti İsrailin Qəzza zolağında apardığı hərbi əməliyyatlara texnoloji dəstəyə etiraz edən əməkdaşı Co Lopezin işinə xitam verib.
ABŞ-ın “Microsoft” texnologiya nəhəngi süni intellekt sahəsində çalışan mühəndisi Co Lopezi, şirkətin İsraillə əməkdaşlığına qarşı çıxış etdikdən sonra işdən çıxarıb. Lopez "Apartheid üçün Azure yoxdur" adlı fəal təşəbbüsün üzvü olub və 19 may tarixində keçirilən “Build 2025” texnologiya konfransında etiraz aksiyası keçirib.
Etiraz zamanı Lopez, Microsoft-un baş direktoru Satya Nadella səhnədə çıxış edərkən "Satya! Niyə Microsoftun fələstinliləri necə öldürdüyünü göstərmirsən? İsrailin hərbi cinayətlərinin Azure tərəfindən dəstəkləndiyini niyə izah etmirsən?" - deyə səslənib. O, təhlükəsizlik əməkdaşları tərəfindən zalı tərk etməyə məcbur edilib. Ardınca "Microsoft işçisi kimi bu soyqırımın tərəfi olmayacağam" – ifadəsini işlədib.
Etirazdan sonra Lopez həmkarlarına ünvanladığı daxili məktubda şirkətin İsrail Müdafiə Nazirliyi ilə bağladığı müqavilələrdən narahat olduğunu bildirib və Microsoft-un bu əməkdaşlığın hərbi əməliyyatlarda istifadə edilmədiyi barədə açıqlamasını “açıq-aşkar yalan” adlandırıb.
Microsoft rəhbərliyi isə məsələ ilə bağlı verdiyi açıqlamada süni intellekt və bulud texnologiyalarının İsrail Müdafiə Nazirliyinə təqdim edildiyini təsdiqləyib, lakin bu texnologiyaların mülki şəxslərə qarşı istifadə olunduğuna dair heç bir dəlilin mövcud olmadığını qeyd edib.
Bununla yanaşı, bəzi istifadəçilər və daxili mənbələr Microsoft-un 22 may tarixindən etibarən “Fələstin”, “Qəzza” və “soyqırım” kimi ifadələrdən ibarət daxili e-poçtların bloklandığını iddia ediblər.
Qeyd edək ki, son aylarda bir sıra texnologiya şirkətləri İsrail ilə əməkdaşlıqları səbəbilə işçi etirazları və ictimai reaksiyalarla üzləşir.
