BAKI, AzerVoice
İranla 30 milyard dollarlıq nüvə sazişi xəbərləri uydurmadır.
AzerVoice xəbər verir ki, ABŞ
prezidenti Donald Tramp İrana 30 milyard dollar dəyərində mülki
nüvə dəstəyi veriləcəyi ilə bağlı iddiaları “əsassız və yalan”
adlandırıb.
O, bu xəbərlərə “Truth Social” platformasında sərt reaksiya
verib.
Tramp paylaşımında deyib: “Hansı saxta xəbər mediası deyə bilər ki, guya prezident Tramp İrana qeyri-hərbi nüvə obyektləri tikmək üçün 30 milyard dollar vermək istəyir? Bu, tamamilə uydurmadır”.
Qeyd edək ki, NBC News-un iddiasına görə, Tramp administrasiyası İranın uran zənginləşdirmə fəaliyyətini dayandırması müqabilində iqtisadi təşviqlər təklif etməyi nəzərdən keçirib. İddialar arasında Tehrana texniki dəstəyin verilməsi, dondurulmuş aktivlərin azad olunması və ümumilikdə 30 milyard dollarlıq iqtisadi imkanların yaradılması məsələləri də yer alırdı.
Tramp bu cür xəbərlərin seçki ərəfəsində ictimai rəyə təsir göstərmək məqsədi daşıdığını bildirib və media qurumlarını dezinformasiya yaymaqda ittiham edib.
