BAKI, AzerVoice, Nailə Babazadə
İranın ali dini lideri Ayətullah Əli Xamenei ABŞ Prezidenti Donald Trampın “İranın nüvə obyektlərinin bombalanaraq məhv edildiyi” iddiasını “xülya” adlandırıb və Vaşinqtonun yeni danışıqlar təklifini qəti şəkildə rədd etdiyini bildirib.
AzerVoice xəbər verir ki, bu haqda Xamenei 43 günlük fasilədən sonra ilk ictimai çıxışında deyib.
“ABŞ prezidenti lovğalanaraq deyir ki, biz İranın nüvə sənayesini bombaladıq və məhv etdik. Yaxşı, qoy o, bu xəyalla yaşasın!”-deyə o bildirib.
Tramp ötən həftə İsrail Knessetində çıxışı zamanı İranın əsas nüvə obyektlərinə 14 bomba atıldığını və bu obyektlərin “tamamilə məhv edildiyini” bildirmiş, Tehrana “yeni razılaşma” imzalamağı təklif etmişdi.
Xamenei bu bəyanata cavab olaraq deyib ki, “ABŞ prezidenti özünü ‘müqavilə adamı’ adlandırır. Amma əgər bir müqavilə güc tətbiqi və diktə ilə müşayiət olunursa, bu, müqavilə deyil, məcburiyyətdir.”
İran lideri, həmçinin İsrailə qarşı cavab zərbələrini xatırladaraq, ölkəsinin hərbi gücünün qorunduğunu vurğulayıb.
“Bizim raketlərimiz hələ də yerindədir. Lazım gələrsə, onları bir daha istifadə edəcəyik.”-deyə Xamenei əlavə edib.
Xamenei ABŞ-ın “İrana təzyiq siyasətinin” nəticəsiz qalacağını bildirib və Vaşinqtonun yeni danışıqlar çağırışlarını “boş və riyakarlıq dolu” adlandırıb.
