BAKI, VOA, Nailə Babazadə

Pakistanın İnformasiya naziri Attaullah Tarar, ölkəsinin Heybər Paxtunxva və Bəlucistan bölgələrində Əfqanıstan Talibanı tərəfindən həyata keçirilən hücumlara cavab verildiyini açıqlayıb. Nazirin bildirdiyinə görə, son toqquşmalarda Əfqanıstan tərəfindən 67 nəfər həlak olub.

VOA xəbər verir ki, nazir Tararın sözlərinə görə, Taliban qüvvələri Şimali Bəlucistanın Killa Saifullah, Noşki və Çaman bölgələrində 16 fərqli nöqtəyə hücum təşkil edib. Pakistan ordusunun 25 nöqtədən açdığı cavab atəşi nəticəsində hücumlar dəf edilib, Talibanın 27 üzvü öldürülüb. Heybər Paxtunxva əyalətində baş verən digər 12 hücumda isə daha 40 əfqan döyüşçüsü zərərsizləşdirilib. Toqquşmalarda bir Pakistan əsgəri şəhid olub, 5-i isə yaralanıb.

Pakistan tərəfi son əməliyyatlar çərçivəsində Əfqanıstan ərazisində ümumilikdə 435 nəfərin öldüyünü, yaralı sayının 630-u keçdiyini bəyan edib. Həmçinin Kabil rejiminin 188 nəzarət məntəqəsi, 188 tank, zirehli texnika və artilleriya qurğusunun məhv edildiyi bildirilir.

İslamabad administrasiyası 2021-ci ildən bəri Talibanın Pakistan Talibanı (TTP) qruplaşmasına qarşı kifayət qədər tədbir görməməsindən narahatdır. Pakistan iddia edir ki, TTP qüvvələri Əfqanıstan ərazisində, xüsusilə Britaniya müstəmləkə dövründən qalan və sərhəd funksiyasını yerinə yetirən Durand xətti boyunca mövqe tutaraq Pakistana hücumlar təşkil edir. Kabil isə bu iddiaları rədd edərək, TTP-nin onların torpaqlarında fəaliyyət göstərmədiyini müdafiə edir.