Yəməndəki husilərin Səudiyyə Ərəbistanının cənubundakı Cazan bölgəsinə atdığı mərmi nəticəsində iki nəfər xəsarət alıb, bir məscid və bir neçə bina zədələnib. Bu barədə şənbə günü Səudiyyə Ərəbistanı Mülki Müdafiə İdarəsi məlumat yayıb.
ArabAZ xəbər verir ki, Mülki Müdafiə qrupları mərminin Ət-Tuval quberniyasına düşməsindən dərhal sonra hadisə yerinə cəlb olunub. Hücum nəticəsində ərazidə yerləşən bir neçə avtomobilə də ciddi ziyan dəyib.
Mülki Müdafiə İdarəsinin sözçüsü mülki obyektlərin hədəfə alınmasını "beynəlxalq humanitar hüququn kobud şəkildə pozulması" adlandırıb. O əlavə edib ki, aidiyyəti qurumlar bu cür hadisələr üçün müəyyən edilmiş bütün zəruri təhlükəsizlik prosedurlarını həyata keçirib.
Bu hücum son günlər Səudiyyə Ərəbistanının cənub bölgələrinə husilər tərəfindən həyata keçirilən raket və pilotsuz uçuş aparatı zərbələrindən sonra krallıqda təhlükəsizlik gərginliyinin artdığı bir vaxta təsadüf edir.
