Bakı, AzerVoice
Özbəkistanda keçirilən "İpək Yolu üzərində turizm" mövzusuna həsr olunan "Daşkənd Beynəlxalq Turizm Sərgisi" çərçivəsində Avrasiya Dağ Kurortları Alyansı nümayəndələrinin iştirakı ilə tədbir keçirilib.
AzerVoice xəbər verir ki, "Şahdağ" Turizm Mərkəzi məlumat yayıb.
Bildirilib ki, tədbirdə Alyansın fəaliyyəti dövründə üzv dövlətlərlə əməkdaşlıq əlaqələrinin inkişafı, iş birliyinin genişləndirilməsi istiqamətində həyata keçirilən işlər və yeniliklər müzakirə olunub.
Tədbir çərçivəsində Alyans üzvlərinə və tədbir iştirakçılarına "Şahdağ" Turizm Mərkəzinin kommersiya direktoru İqor Şaulov tərəfindən kompleksin qış turizm imkanları, yeni layihələr, keçirilməsi nəzərdə tutulan beynəlxalq yarışlar haqqında ətraflı məlumat təqdim edilib.
Tədbir zamanı növbəti Avrasiya Dağ Kurortları Festivalının təşkili "Şahdağ" Turizm Mərkəzinə ötürülüb və tədbirin 2025-ci ilin mart ayında keçirilməsi qərara alınıb.
Qeyd edilib ki, bundan öncəki Avrasiya Dağ Kurortları Festivalı Rusiyanın Soçi şəhərində baş tutub. Tədbirdə 9 ölkənin kurort sənayesinin və tərəfdaş şirkətlərin 150 nümayəndəsi iştirak edib.
Şahdağ Turizm Mərkəzinin də üzv olduğu Avrasiya Dağ Kurortları Alyansı hazırda Özbəkistanın Amirsoy, Qazaxıstanın Şımbulak və Oy Qaraqay, Rusiyanın Roza Xutor və Cənubi Koreyanın Mono Yong Pyon dağ kurortlarını özündə birləşdirir.
