Tramp İran üçün yeni şərtlər açıqladı: Hörmüz boğazı tam açılmalıdır
ABŞ Prezidenti Donald Tramp İranla mümkün razılaşma üçün Vaşinqtonun əsas şərtlərini açıqlayıb. Trampın sözlərinə görə, Tehran nüvə silahı əldə etməyəcəyinə dair öhdəlik götürməli, Hörmüz boğazını hər iki istiqamətdə sərbəst şəkildə açmalı, boğazda qalan minaları təmizləməli və zənginləşdirilmiş uran ehtiyatları ilə bağlı tələbləri yerinə yetirməlidir. ABŞ Prezidenti bildirib ki, bu addımlar qarşılığında Vaşinqton İran limanlarına tətbiq edilən dəniz blokadasını ləğv etməyə hazırdır. Bəyanat ABŞ–İran danışıqlarında mümkün razılaşma çərçivəsinin formalaşdığı bir dövrdə diqqət çəkən siyasi mesaj kimi qiymətləndirilir.
ABŞ–İran danışıqlarının taleyi yaxın saatlarda müəyyənləşə bilər
ABŞ Prezidenti Donald Tramp İranla bağlı aparılan danışıqların taleyini müəyyən edə biləcək mühüm qərar ərəfəsindədir. Tramp Ağ Evin Situasiya Otağında komandasının üzvləri ilə görüş keçirərək İran məsələsində necə irəlilənəcəyinə dair son qərarı verəcəyini açıqlayıb. Müzakirələrin əsas mövzuları arasında müvəqqəti atəşkəsin uzadılması, Hörmüz boğazında vəziyyət, İranın yüksək zənginləşdirilmiş uran ehtiyatları və sanksiyalar rejimi yer alır. Analitiklər hesab edirlər ki, Vaşinqtonun qarşıdakı qərarı ya diplomatik razılaşmanın təsdiqlənməsi, ya da tərəflər arasında gərginliyin yeni mərhələyə keçməsi ilə nəticələnə bilər.
ABŞ–İran danışıqları niyə dalana dirənir?
Təhlükəsizlik və müdafiə məsələləri üzrə analitik Volfqanq Pusztai hesab edir ki, ABŞ və İran arasında razılaşma əldə olunması əvvəlkindən daha çətin mərhələyə daxil olub. Onun sözlərinə görə, Donald Tramp administrasiyası artıq “pis razılaşma yoxdursa, razılaşma yoxdur” yanaşmasına üstünlük verir və qarşıdan gələn siyasi proseslər fonunda güzəştli sazişə maraq azalıb. Ekspert eyni zamanda İranın da müəyyən razılaşmaya ehtiyac duyduğunu bildirir. Bununla yanaşı, o xəbərdarlıq edir ki, müharibənin uzanması enerji bazarlarında qiymət artımını sürətləndirə və xüsusilə Afrika ölkələrində milyonlarla insan üçün ciddi iqtisadi və humanitar problemlər yarada bilər.
ABŞ–İran danışıqlarında müsbət siqnallar: mümkün razılaşma müharibəyə son qoya bilər?
ABŞ və İran arasında davam edən diplomatik təmaslarla bağlı yeni məlumatlar danışıqlar prosesində müəyyən müsbət dinamikanın yarandığını göstərir. Bildirilir ki, tərəflər arasında müzakirələr irəliləyiş nümayiş etdirsə də, proses hələ də həssas mərhələdə qalır. Məlumata görə, hazırda Anlaşma Memorandumu üzrə müzakirələr aparılır və bu sənəd gələcək danışıqlar üçün hüquqi və siyasi çərçivə yarada bilər. Bununla yanaşı, ekspertlər gərginliyin hələ də yüksək olduğunu və hər an prosesin gözlənilməz maneələrlə qarşılaşa biləcəyini qeyd edirlər.
Qlobal bazarlar ABŞ–İran danışıqlarına necə reaksiya verir?
Qlobal maliyyə bazarları ABŞ–İran danışıqlarına dair gözləntilər fonunda yüksəliş nümayiş etdirir. Neft qiymətləri iki həftənin ən aşağı səviyyəsinə enib, Asiya valyutaları möhkəmlənib, qızıl qiyməti artıb və Yaponiyanın Nikkei indeksi tarixdə ilk dəfə 65 000 həddini keçərək son altı ilin ən sürətli üçgünlük yüksəlişini göstərib. Bu vəziyyət investorların diqqətini bazarlara yönəldib və gələcək ticarət trendlərinə dair proqnozları aktivləşdirib.
Marko Rubio: Razılaşma olmazsa alternativ planlar mövcuddur
ABŞ dövlət katibi Marko Rubio ABŞ və İran arasında razılaşmanın əldə olunması üçün bəzi müsbət siqnalların olduğunu bildirib. Pakistan rəsmilərinin Tehrana səfərinin prosesi irəli apara biləcəyi vurğulanıb. Rubio ABŞ Prezidentinin əsas məqsədinin yaxşı razılaşma əldə etmək olduğunu qeyd edib və əgər razılaşma alınmasa, alternativ variantların mövcud olduğunu əlavə edib. Dövlət katibi həddindən artıq optimist olmasa da, növbəti günlərdə baş verəcək prosesləri diqqətlə izləyəcəklərini söyləyib.
İran Prezidenti Məsud Pezeşkian Pakistanın daxili işlər naziri ilə görüşüb
İran Prezidenti Məsud Pezeşkian Pakistanaın daxili işlər naziri Möhsin Nəqvi ilə görüş keçirib. Pezeşkian bildirib ki, İran Pakistanın regionda sabitliyi və əməkdaşlığı təşviq edən səylərini dəstəkləyir. Möhsin Nəqvi isə dialoq və qarşılıqlı anlaşma yolunun davam etdirilməsinin vacibliyini vurğulayıb. Görüş zamanı tərəflər ABŞ–İran danışıqlarının hazırkı vəziyyətini müzakirə ediblər.
Türkiyənin Xarici İşlər Naziri: “ABŞ və İranın ortaq məxrəcə gəlməməsi üçün səbəb yoxdur”
Türkiyənin xarici işlər naziri Hakan Fidan ABŞ və İranın ortaq məxrəc tapmasına heç bir maneə görmədiyini bildirib, Pakistan vasitəçiliyi və mövcud atəşkəsin qorunmasına dəstək verdiyini açıqlayıb.
İslamabad prosesin uzadılmamasının vacibliyini vurğulayıb
Pakistan ABŞ–İran danışıqlarının davam etməsini təşviq edir və vaxt məhdudiyyətinə diqqət çəkir. Prosesdə dolayı kommunikasiya kanalı açıq qalır, ABŞ Prezidenti də sürətli nəticələnmənin vacibliyini vurğulayıb.
Tramp Vatikan Papasına İran ilə bağlı müraciət etdi
ABŞ prezidenti Donald Tramp NATO ilə bağlı sərt açıqlama verib. Onun sözlərinə görə, alyans indiyə qədər ABŞ-ın yanında olmayıb və gələcəkdə də olmayacaq.
