BAKI,VOA Orxan Qədirzadə
Türkiyə Statistika Təşkilatının (TÜİK) 2025-ci il üzrə Daxili Miqrasiya Statistikalarına əsasən, ötən il ölkədə 11 min 885 nəfər təqaüdə çıxması səbəbindən yaşayış yerini dəyişib. İstanbul həm ən çox təqaüdçü qəbul edən, həm də ən çox təqaüdçü köçü verən şəhər olub.
TÜİK-in açıqladığı məlumatlara görə, 2025-ci ildə Türkiyədə ümumilikdə 2 milyon 475 min 19 nəfər şəhərlər arasında yaşayış yerini dəyişib.
Şəhərlərarası miqrasiyanın əsas səbəbləri sırasında təhsil, daha yaxşı mənzil və yaşayış şəraiti, eləcə də ailə üzvlərindən birinə bağlı olaraq köç etmə halları üstünlük təşkil edib.
Bununla yanaşı, ötən il 11 min 885 nəfər məhz təqaüdə çıxması səbəbindən başqa şəhərə köçüb.
Təqaüd səbəbindən ən çox köç qəbul edən şəhər 1 103 nəfərlə İstanbul olub. Sonrakı yerlərdə 921 nəfərlə Balıkesir və 828 nəfərlə Ankara qərarlaşıb.
Ən az təqaüdçü qəbul edən şəhərlər isə Gümüşhane (3 nəfər), Iğdır (9 nəfər) və Siirt (9 nəfər) olub.
Təqaüdə çıxdıqdan sonra başqa şəhərə köç edənlərin sayına görə də İstanbul ilk yerdə qərarlaşıb.
Məlumata əsasən, 2025-ci ildə İstanbuldan 3 min 344 nəfər təqaüdə çıxdıqdan sonra başqa şəhərlərə köçüb. Beləliklə, təqaüd səbəbindən yaşayış yerini dəyişən hər üç nəfərdən təxminən biri İstanbulu tərk edib.
Ankaradan bu səbəblə köç edənlərin sayı 1 080, İzmirdən isə 694 nəfər təşkil edib.
Ən az təqaüdçü köçü verən şəhər Ardahan olub. Bu vilayətdən 10 nəfər yaşayış yerini dəyişib. Bayburtdan 18, Muşdan isə 26 nəfər təqaüdə çıxması səbəbindən başqa şəhərlərə köçüb.
TÜİK-in məlumatına görə, 2025-ci ildə ev aldığı üçün şəhər dəyişənlərin sayı isə 60 min 22 nəfər olub.
Ev sahibi olduqdan sonra ən çox köç qəbul edən şəhər 8 min 189 nəfərlə İstanbul olub. Ankara 6 min 779 nəfərlə ikinci, Kocaeli isə 2 min 548 nəfərlə üçüncü sırada yer alıb. Beləliklə, Kocaeli bu göstəricidə İzmiri geridə qoyub.
Ev alma səbəbindən ən çox köç verən şəhər də 15 min 135 nəfərlə İstanbul olub. Bu göstərici Ankarada 3 min 172, İzmirdə isə 2 min 746 nəfər təşkil edib.
