Özbəkistan Prezident Administrasiyasının rəhbəri Səidə Mirziyoyeva 15–17 sentyabr 2026-cı il tarixlərində Dubay Dünya Ticarət Mərkəzində keçirilməsi planlaşdırılan Ərəb Media Sammitinin ilk günündə təşkil olunacaq Hökumət Kommunikasiyaları Forumunda əsas məruzə ilə çıxış edəcək. Dubay Media Şurasının sədr müavini və idarəedici direktoru, Dubay Mətbuat Klubunun prezidenti və Ərəb Media Sammiti Təşkilat Komitəsinin sədri Mona Qanəm əl-Mərri Səidə Mirziyoyevanın sammitdə iştirakını alqışlayaraq bildirib ki, onun iştirakı sammit çərçivəsindəki müzakirələri zənginləşdirəcək, habelə regionun və onun hüdudlarından kənarın nüfuzlu liderləri arasında dialoqu, bilik mübadiləsini və əməkdaşlıq imkanlarını gücləndirəcək.
Səidə Mirziyoyevanın iştirakı Özbəkistanın dövlət kommunikasiyası sahəsindəki təcrübəsini, medianın inkişaf və modernləşmənin təşviqindəki rolunu, etimadın formalaşmasında, cəmiyyətlə dialoqun möhkəmləndirilməsində və mühüm təsirin yaradılmasında institusional kommunikasiyanın əhəmiyyətini ön plana çıxaracaq.
Ərəb Media Sammiti 2026 çərçivəsində bir sıra ixtisaslaşmış tədbirlər, o cümlədən Ərəb Media Forumu, Hökumət Kommunikasiyaları Forumu, Ərəb Gənclər Media Forumu, Ərəb Sosial Media İnfluenserləri Sammiti, Filmlər Forumu, Oyunlar Forumu və "Dubai PodFest" tədbiri ilə yanaşı, bir neçə beynəlxalq media forumu təşkil ediləcək.
