İraq Hökumətinin Baş naziri Əli Faleh əl-Zeydi, dövlət əmlakının və büdcə vəsaitlərinin qanunsuz mənimsənilməsinin qarşısını almaq və oğurlanmış pulları dövlətə geri qaytarmaq üçün korrupsiyaya qarşı mübarizəni qətiyyətlə davam etdirəcəklərini bəyan edib.
ArabAZ xəbər verir ki, İraq Nazirlər Kabinetinin ötən gecə keçirilən iclasından sonra rəsmi hökumət bəyanatında yer alan açıqlamasında Baş nazir vurğulayıb ki, son günlər həyata keçirilən irimiqyaslı əməliyyatlar korrupsiyaya qarşı mübarizənin hələ ilk mərhələsidir.
O, İraq xalqının maraqlarını qorumağa borclu olduqlarını və bu məsuliyyətdə heç bir güzəştə yol verilməyəcəyini bildirib.
“Mövcud vəziyyətə artıq səssiz qalmaq qeyri-mümkündür. İraq xalqının durumuna olan canıyanalığımız bizi vətəndaşlarımıza dövlət büdcəsinin güclü keşikçiləri olduğunu sübut etməyə və həmin vəsaitlərdən düzgün istifadə olunmasını təmin etməyə sövq edir”.-deyə o qeyd edib.
Əli əl-Zeydi İraqın uzun illər boyu müharibələr, xaos və terrorizmlə mübarizə dövrlərindən keçdiyini, lakin bu gün hökumətin tamamilə fərqli bir xətt götürdüyünü diqqətə çatdırıb. Onun sözlərinə görə, əsas hədəf İraq dövlətinin qüdrətini artırmaq, güc və silah tətbiqini yalnız dövlətin inhisarında saxlamaq və korrupsionerlərin dövlət orqanlarına sızaraq xalqın pulunu oğurlamasına birdəfəlik son qoymaqdır.
Baş nazir həmçinin gələn ilin dövlət büdcəsinin proqram əsaslı hazırlanması prosesinə başlamağa çağırıb. Yeni büdcədə elektrik enerjisi sektoruna daha çox vəsait ayrılacağını bildirən hökumət başçısı, cari il ərzində əlavə 2000 meqavatlıq enerji müqavilələrinin bağlanacağını və bununla da gələn il milli elektrik şəbəkəsinin vəziyyətinin xeyli yaxşılaşacağını qeyd edib.
Hökumətin bəyanatında o da bildirilir ki, Əli əl-Zeydi bütün nəzarət və təftiş orqanlarına tapşırıq verərək, nazirliklərin və dövlət qurumlarının fəaliyyətində hər hansı korrupsiya və ya səhlənkarlıq göstəricisi aşkarlandıqda dərhal hərəkətə keçilməsini tələb edib.
Xatırladaq ki, İraq təhlükəsizlik qüvvələri dünəndən etibarən genişmiqyaslı korrupsiya əməliyyatına başlayıb. Əməliyyat çərçivəsində aralarında böyük partiya liderləri, İraq Parlamenti üzvləri (millət vəkilləri) və yüksək rütbəli dövlət rəsmiləri də daxil olmaqla 47 nəfər həbs edilib və istintaq hələ də davam edir.
