ABŞ-da yerləşən “Excelerate Energy” şirkəti çərşənbə günü verdiyi açıqlamada, Yaxın Şərqdə davam edən münaqişələr səbəbindən İraqın cənubunda yerləşən sabit terminal infrastrukturunun tikintisinin müvəqqəti olaraq təxirə salındığını bəyan edib.
ArabAZ xəbər verir ki, İraqın cənubundakı Xor əl-Zübeyr limanında inşası nəzərdə tutulan mayeləşdirilmiş təbii qaz (LNG) terminalının ilkin planlaşdırıldığı kimi 2026-cı ilin üçüncü rübündə deyil, yalnız 2027-ci ildə fəaliyyətə başlaması gözlənilir. Şirkət bildirib ki, mövcud şərtlər ölkənin etibarlı və genişləndirilə bilən LNG idxal infrastrukturuna olan ehtiyacını daha da artırır və şərait imkan verən kimi layihənin inkişafı davam etdiriləcək. İraqda xroniki elektrik kəsintiləri və yerli qaz emalı potensialının qeyri-kafi olması bu layihənin uzunmüddətli həyat qabiliyyətini təmin edən əsas amillərdir.
İraq Elektrik Enerjisi Nazirliyinin bəyanatına görə, təklif olunan LNG terminalının tikintisi Hörmüz boğazının bağlanması səbəbindən təxirə salınıb. Nazirlik qeyd edib ki, terminalın inşası, mülki işlərin aparılması və gəmilərin yan alması üçün Cənubi Koreyadan İraqa qədər təhlükəsiz dəniz yolu və zəruri dəniz keçidinin təmin edilməsi vacibdir. Bu gecikmə “Excelerate Energy”nin yanvar ayında “Hull 3407” adlı Üzən Saxlama və Reqazifikasiya Qurğusunun (FSRU) dəniz sınaqlarını və təhlükəsizlik testlərini uğurla keçməsindən sonra baş verib. Xatırladaq ki, ötən ilin oktyabrında İraq hökuməti ölkənin enerji infrastrukturunu gücləndirmək və qaz idxalı imkanlarını yaxşılaşdırmaq məqsədilə “Excelerate Energy” ilə üzən təbii qaz platformasının inşası üçün müqavilə imzalamışdı.
Layihənin əsas məqsədi idxal olunan qazı boru kəmərləri vasitəsilə ölkə boyu elektrik stansiyalarına ötürməkdir. Gündəlik 500 milyon standart kubfut gücünə malik olacaq bu üzən obyekt İraqa 3000-4000 meqavat enerji istehsal etməyə kömək edəcək. Müqaviləyə əsasən, İraq hər yükdaşımada 125 000-dən 170 000 kubmetrə qədər LNG qəbul edə bilən FSRU vasitəsilə bərpa olunan beşillik müddət ərzində gündəlik təxminən 15 milyon kubmetr qaz alacaq. Regional gərginlik layihənin icra müddətini uzatsa da, bu terminal İraqın enerji müstəqilliyi və təhlükəsizliyi üçün strateji əhəmiyyət kəsb etməkdə davam edir.
