Sudan Suverenlik Şurasının sədri Əbdülfəttah əl-Burhan çərşənbə axşamı Maskatda Oman sultanı Heysəm bin Tariq ilə görüşərək bu Afrika dövlətindəki hadisələri müzakirə edib.
ArabAZ xəbər verir ki, sultan Omanın Sudanın təhlükəsizliyi, sabitliyi və rifahına verdiyi dəstəyi ifadə edib.
Əl-Burhan artıq dördüncü ilinə qədəm qoyan Sudandakı münaqişənin dialoq və dinc yollarla həlli, habelə milli birliyin gücləndirilməsi istiqamətində Omanın göstərdiyi səyləri yüksək qiymətləndirib. Agentlik əlavə edib ki, hər iki tərəf tərəfdaşlıq sahələrinin genişləndirilməsinin və konstruktiv əməkdaşlığın inkişaf etdirilməsinin vacibliyini vurğulayıblar.
Görüşdə Omanın xarici işlər naziri Seyid Bədr bin Həməd əl-Busaidi və Sudanın xarici işlər naziri Mühi əd-Din Salem Əhməd də daxil olmaqla bir neçə rəsmi şəxs iştirak edib.
Əl-Burhan bazar ertəsi günü Ciddədə Səudiyyə Ərəbistanının vəliəhd şahzadəsi Məhəmməd bin Salman ilə də görüşüb. Səudiyyə Xəbər Agentliyinin (SPA) məlumatına görə, iki lider Sudandakı son hadisələri, onların fəsadlarını və vəziyyətin nizamlanması üçün göstərilən səyləri müzakirə ediblər.
“Sərhədsiz Həkimlər” (MSF) təşkilatının məlumatına görə, 2023-cü ilin aprelində vətəndaş müharibəsi başlayandan bəri Sudanda ən azı 33,7 milyon insanın humanitar yardıma ehtiyacı var və 14 milyon insan evlərindən didərgin düşüb.
