Suriya Prezidenti Əhməd əş-Şərra çərşənbə günü Dohada Qətər Əmiri Şeyx Təmim bin Həməd Al Tani ilə görüşüb. ArabAZ xəbər verir ki, görüşdə tərəflər ikitərəfli münasibətlərin gücləndirilməsi yollarını müzakirə ediblər.
Yüksək səviyyəli görüşdə Suriyanın xarici işlər naziri Əsəd Həsən əş-Şeybani, Qətərin Baş naziri və xarici işlər naziri Şeyx Məhəmməd bin Əbdülrəhman Al Tani, həmçinin hər iki ölkənin digər rəsmi şəxsləri iştirak ediblər.
Müzakirələr müxtəlif sektorlarda, xüsusilə iqtisadiyyat və investisiya sahələrində əməkdaşlığın genişləndirilməsinə, eləcə də ticarət əlaqələrinin gücləndirilməsinə yönəlib. Prezident Əş-Şərra Suriyanın Qətər və İranın təcavüzündən zərər çəkmiş digər ərəb ölkələri ilə həmrəy olduğunu bir daha təsdiqləyib. Görüşdə həmçinin son regional və beynəlxalq hadisələr, regionda təhlükəsizlik və sabitliyin qorunması üçün səylərin əlaqələndirilməsi yolları nəzərdən keçirilib.
Bu görüş Suriyanın regional tərəfdaşları ilə son vaxtlar artan yüksək səviyyəli diplomatik təmaslarının davamıdır. Belə ki, çərşənbə axşamı Ciddədə Prezident Əhməd əş-Şərra ilə Səudiyyə Ərəbistanının Vəliəhd şahzadəsi Məhəmməd bin Salman arasında keçirilən danışıqlarda da əsas diqqət iqtisadi və investisiya sektorları başda olmaqla ikitərəfli əlaqələrin möhkəmləndirilməsinə yönəlmişdi.
