Körfəz Əməkdaşlıq Şurası (GCC) ölkələri üzrə sukuk emissiyası 2026-cı ilin ilk dörd ayında 13,1 faiz artıb. Regional münaqişələrin İslam maliyyə sənayesi üçün yaratdığı qeyri-müəyyənliklərə baxmayaraq, bu artım əsasən Səudiyyə Ərəbistanındakı güclü yerli valyuta borclanması hesabına baş verib. “S&P Global Ratings” agentliyinin “İslam Maliyyəsi 2026-2027: Fırtınalı Sularda Naviqasiya” adlı son hesabatında qeyd olunur ki, qlobal sukuk emissiyası bu dövrdə Malayziya, Türkiyə və İndoneziyadakı aktivlik sayəsində 20 faiz yüksəlib.
ArabAZ xəbər verir ki, rəqəmlər Körfəz kapital bazarlarının qlobal İslam maliyyə sənayesində artan əhəmiyyətini vurğulayır. Bununla belə, S&P bildirir ki, geosiyasi gərginliklər və Yaxın Şərqdə davam edən müharibə Körfəzin əsas bazarlarında iqtisadi artım perspektivlərinə mənfi təsir göstərir. Agentlik qlobal İslam maliyyə sənayesinin böyümə sürətinin 2025-ci ildəki 10,2 faizdən sonra 2026-cı ildə 5-10 faizə qədər yavaşlayacağını proqnozlaşdırır. S&P-nin İslam maliyyəsi üzrə rəhbəri Mohamed Damak qeyd edib ki, münaqişə bir çox İslam maliyyəsi ölkəsində iqtisadi artım imkanlarını azaldıb və borc kapital bazarı fəallığına təsir edib.
S&P-nin baza ssenarisinə görə, ABŞ və İranın Hörmüz boğazının blokadasını yumşaldan razılığa gələcəyi və mayın sonuna qədər neft axınının bərpa olunacağı ehtimal edilir. Agentlik bildirir ki, İslam maliyyəsinin 2027-ci ildə yenidən sürətlə böyüməsi üçün neft-qaz tədarükünün və ticarət axınının normallaşması zəruridir.
Eyni zamanda, “Fitch Ratings” tərəfindən hazırlanan digər hesabatda qeyd olunur ki, Körfəz investorlarının Mərkəzi Asiyaya marağı artır. Qazaxıstan və Qırğızıstanın bu sahədə liderlik edəcəyi, Özbəkistan və Azərbaycanın isə sektor üçün ilkin bazaları formalaşdırdığı vurğulanır.
