Səudiyyə Ərəbistanının vəliəhdi və Baş naziri şahzadə Məhəmməd bin Salman bin Əbdüləziz, Livan Prezidenti Cozef Avn və Baş nazir Nəvaf Salamın rəsmi xahişinə əsasən, Livan məhsullarının krallığa olan ixracatının yenidən bərpa edilməsi barədə xüsusi göstəriş verib.
ArabAZ xəbər verir ki, bu qərar Livan hökumətinin dövlət təsisatlarının yenidən qurulması yolunda atdığı müsbət addımlar, aidiyyəti daxili mütəxəssis qruplarının keçən il boyunca əldə etdiyi mühüm nəticələr, həmçinin Beyrut rəhbərliyinin nümayiş etdirdiyi tam əməkdaşlıq mühiti və tələb olunan dövlət öhdəliklərini təqdim etməsi nəticəsində qəbul olunub.
Səudiyyə Ərəbistanının Xarici işlər naziri şahzadə Feysəl bin Fərhan çərşənbə günü Livanın Baş naziri ilə keçirdiyi telefon danışığı zamanı bu rəsmi göstərişi qarşı tərəfə çatdırıb. Nazir telefon söhbətində krallığın Livanın sabitliyinə, onun bütün torpaqları üzərindəki mütləq suverenliyinə və xalqının rifahına verdiyi böyük dəstəyi yenidən vurğulayıb. O həmçinin əminliyini bildirib ki, rəsmi Beyrut bu ölkənin öz qardaş dövlətlərinə zərər vuracaq bir hərbi-siyasi platformaya çevrilməməsi üçün zəruri olan bütün təhlükəsizlik tədbirlərini qətiyyətlə həyata keçirəcəkdir.
Öz növbəsində, Cozef Aun bu qərara görə şahzadə Məhəmməd bin Salmana minnətdarlığını və yüksək ehtiramını dilə gətirib. Livan prezidenti bildirib ki, qəbul olunan bu qərar iki qardaş ölkəni birləşdirən ərəb qardaşlığının dərinliyinin səmimi bir ifadəsi, həmçinin Səudiyyə Ərəbistanının müdrik rəhbərliyinin dirçəliş və bərpa mərhələsindən keçən Livanı və onun xalqını dəstəkləmək istəyinin bariz təzahürüdür.
Livan dövlət başçısı xüsusi olaraq vurğulayıb ki, atılan bu xeyirxah addım Livanın milli iqtisadiyyatının canlanmasına, livanlı istehsalçı və ixracatçıların geniş təbəqələrinin maddi baxımdan birbaşa dəstəklənməsinə hiss olunacaq dərəcədə böyük töhfə verəcəkdir. O qeyd edib ki, bütün Livan xalqı bu qərara görə dərin təşəkkür hissi keçirir və buna iki ölkə arasında ortaq tale, ortaq tarix və qırılmaz bağlar üzərində qurulan köklü münasibətləri daha da möhkəmləndirən mühüm bir addım kimi baxır.
Bununla yanaşı, Livanın Baş naziri də qeyd edib ki, Livan məhsullarının ixracına qoyulmuş qadağanın rəsmən ləğv edilməsi iki ölkəni birləşdirən tarixi qardaşlıq əlaqələrinin dərinliyini nümayiş etdirir. Nəvaf Salam bu qərarın Səudiyyə Ərəbistanının Livana olan dövlət etibarını və hər iki xalqın mənafeyinə xidmət edən iqtisadi-ticari əməkdaşlığı genişləndirmək barədə müştərək istəyini tam təcəssüm etdirdiyini bildirib.
Nəvaf Salam vurğulayıb ki, bu qərar Livan iqtisadiyyatını dəstəkləmək, livanlı istehsalçı və ixracatçılar üçün yeni qlobal üfüqlər açmaq, həmçinin ölkədə ümumi inkişaf və sabitlik imkanlarını gücləndirmək baxımından olduqca mühüm bir mərhələdir.
Livanın Baş naziri hər iki ölkənin xeyrinə və tərəqqisinə xidmət edəcək müxtəlif sahələrdə tərəfdaşlıq və əməkdaşlıq əlaqələrini daha da dərinləşdirmək məqsədilə, Livan dövlətinin Səudiyyə Ərəbistanı ilə birgə fəaliyyəti və koordinasiyanı davam etdirmək niyyətində olduğunu bəyan edib.
