İslam dünyasının baş məbədi sayılan müqəddəs Kəbədə növbəti illik yuyulma mərasimi reallaşıb. Məhərrəm ayının 15-nə (30 iyun) təsadüf edən bu qədim sənət və ibadət ənənəsi İslam peyğəmbəri Həzrəti Məhəmmədin (s.ə.s) qoyduğu xüsusi nümunə əsasında həyata keçirilir.
ArabAZ xəbər verir ki, Səudiyyə Ərəbistanı rəsmilərinin, İslam ölkələrinin diplomatlarının və din xadimlərinin iştirak etdiyi builki mərasim, İki Müqəddəs Ocağın İşləri üzrə Baş İdarənin xüsusi təşkilati və texniki hazırlığı şəraitində yüksək səviyyədə təşkil olunub.
Mərasim başlamazdan əvvəl Beytullahın qızıl qapısı rəsmi olaraq açılıb və daxili hissədə təmizlik işlərinə başlanılıb. Kəbənin daxili divarları və mərmər sütunları İdarə tərəfindən öncədən hazırlanan müqəddəs Zəmzəm suyu, Tayif qızılgülü rəngi və xalis ud yağının qarışığı ilə təmizlənib. Yuyulma prosesində divarlar xüsusi ağ ipək və pambıq parçalarla silinib, döşəməyə tökülən ətirli Zəmzəm suyu isə xurma yarpaqları və xüsusi təmizləyicilərlə qurudulub. Sonda daxili divar və sütunlar müşk, ənbər və qiymətli yağlarla ətirlənib, müqəddəs məkana xalis ud buxurları verilib. Bu tarixi ritualla yanaşı, İslam Yeni ilinin gəlişi ilə əlaqədar Kəbənin örtüyü (Kisvə) də ənənəvi olaraq yenilənib. Əsrlər boyu qorunub saxlanılan bu ənənə müsəlmanların öz qiblələrinə olan dərin ehtiramını, birliyini və müqəddəs irsin nəsildən-nəslə ötürülməsini simvolizə edir.
