Beynəlxalq Əmək Təşkilatı (BƏT) hazırladığı son hesabatda xəbərdarlıq edib ki, iş yerindəki gərginlik, təqiblər və uzun iş saatları kimi psixososial risklər hər il dünya miqyasında 840 min insanın həyatına son qoyur. İş mühitində psixi sağlamlığa dair bu hesabat çərşənbə axşamı qeyd olunan Ümumdünya Əməyin Mühafizəsi və Sağlamlığı Günü ərəfəsində dərc edilib.
ArabAZ xəbər verir ki, BƏT-in Ümumdünya Səhiyyə Təşkilatının (ÜST) məlumatlarına əsaslanan hesablamalarına görə, işlə bağlı psixososial risk faktorları “hər il ürək-damar xəstəlikləri və ya psixi pozğunluqlar səbəbindən təxminən 840 min ölümə” yol açır. Hesabatda bu xəstəliklərin mənşəyinin çoxfaktorlu olduğu qeyd edilsə də, çoxsaylı uzunmüddətli araşdırmaların “iş yerindəki mənfi psixososial təsirlər ilə psixi və ürək-damar sağlamlığı arasında tutarlı əlaqələri” ortaya qoyduğu vurğulanır.
5 əsas risk faktoru
Hesabatda işlə bağlı beş əsas psixososial risk faktoru müəyyən edilib:
Gərginlik (stress);
Uzun iş saatları;
Təqiblərə (bullinq və mobbinq) məruz qalma;
Zəhmət və mükafat arasındakı qeyri-mütənasiblik;
İşsiz qalma qorxusu (iş qeyri-müəyyənliyi).
Beynəlxalq Əmək Təşkilatı qlobal səviyyədə müntəzəm və müqayisə edilə bilən məlumatların təmin edilməsi üçün tədqiqatların gücləndirilməsini, habelə effektiv üsulların yayılması üçün mövcud siyasətlərin daha dəqiq qiymətləndirilməsini tövsiyə edir.
İqtisadi zərbə: Qlobal ÜDM-in 1,37 faizi
Hesabatda profilaktika tədbirlərini təkmilləşdirmək üçün əməyin mühafizəsi orqanları, ictimai səhiyyə müəssisələri və sosial tərəfdaşlar arasında əməkdaşlığın artırılması zərurəti qeyd olunur. İş yerlərində menecerlərin işçilərlə əməkdaşlıq edərək psixososial riskləri daha ciddi nəzərə almaları tövsiyə olunur.
İqtisadi nəticələrə gəlincə, psixososial risklərlə bağlı ürək-damar xəstəlikləri və psixi pozğunluqların illik iqtisadi maliyyəti “qlobal Ümumi Daxili Məhsulun (ÜDM) 1,37 faizi” həcmində qiymətləndirilir.
