Ər-Riyad regional bələdiyyəsinin sədri şahzadə Feysəl bin Əbdüləziz bin Əyyaf və Tokionun qubernatoru Yuriko Koike çərşənbə günü virtual formatda görüş keçiriblər. Görüşdə hər iki paytaxt arasında rəqəmsal transformasiya və ağıllı şəhərlərin (smart city) inkişafı sahəsində təcrübə mübadiləsi və tərəfdaşlıq məsələləri müzakirə olunub.
ArabAZ xəbər verir ki, Səudiyyə Ərəbistanı və Yaponiyanın rəsmi nümayəndələrinin iştirak etdiyi iclasda rəqəmsal transformasiyanın şəhər idarəçiliyində tətbiqi, ağıllı şəhər texnologiyaları, süni intellekt (AI) və data analitikası sahəsində əməkdaşlıq imkanları nəzərdən keçirilib.
Şəhər idarəçiliyində səmərəlilik və yeni imkanlar
Tərəflər rəqəmsal transformasiya prosesində qarşıya çıxan əsas çətinliklər və imkanlar barədə fikir mübadiləsi aparıblar. Bu texnologiyaların şəhər xidmətlərinin keyfiyyətinin yüksəldilməsində və bələdiyyə idarəçiliyinin səmərəliliyinin artırılmasında oynadığı rol xüsusi vurğulanıb.
Müzakirələr zamanı bilik və texniki təcrübənin bölüşdürülməsi, həmçinin bələdiyyə xidmətlərinin inkişafı, sakinlərin həyat keyfiyyətinin yaxşılaşdırılması və şəhər əməliyyatlarına dəstək məqsədilə qabaqcıl beynəlxalq təcrübələrdən yararlanmaq yolları araşdırılıb.
Görüşün sonunda hər iki tərəf Ər-Riyad və Tokio arasında əlaqələri gücləndirmək, birgə komandaların işini davam etdirmək və rəqəmsal şəhərsalma sahəsində qarşılıqlı əməkdaşlıq layihələrini dərinləşdirmək barədə razılığa gəliblər.
