ABŞ Enerji İnformasiya Administrasiyası (EIA) açıqladığı hesabatda İraqın ABŞ-a xam neft ixracının bir ay ərzində 50 faiz azaldığını bildirib. İraq aprel ayında ABŞ-a təxminən 3,21 milyon barel xam neft ixrac edib, halbuki bu rəqəm mart ayında 6,44 milyon barel təşkil etmişdi.
ArabAZ xəbər verir ki, aprel ayının həftəlik göstəricilərinə nəzər saldıqda maraqlı bir dalğalanma müşahidə olunur: ilk həftədə gündəlik orta ixrac 109 000 barel olub, ikinci həftədə bu rəqəm 48 000 barelə düşüb, üçüncü həftədə 195 000 barelə yüksəlsə də, dördüncü həftədə yenidən azalaraq 76 000 barelə enib. Bu kəskin azalmaya baxmayaraq, İraq aprel ayında Kanada, Səudiyyə Ərəbistanı, Meksika, Venesuela və Kolumbiyadan sonra ABŞ-ın altıncı ən böyük neft tədarükçüsü olaraq qalıb. Ərəb ölkələri arasında isə İraq təxminən 9,54 milyon barel neft tədarük edən Səudiyyə Ərəbistanından sonra ikinci yerdədir.
Hesabatda vurğulanır ki, İraqın dəniz yolu ilə xam neft ixracı aprel ayında Hörmüz boğazında dəniz nəqliyyatının davamlı olaraq pozulması səbəbindən görünməmiş səviyyəyə düşüb. Məlumata görə, İraqın ümumi neft ixracı 2025-ci ilin aprel ayı ilə müqayisədə 96 faiz, cari ilin mart ayı ilə müqayisədə isə 76 faiz azalaraq gündəlik cəmi 131 000 barelə qədər geriləyib. Qeyd edək ki, ABŞ gündəlik 20 milyon bareldən çox neft istehlakı ilə dünyanın ən böyük neft istehlakçısıdır.
