BAKI, AzerVoice, Fərid Mikayılov
Barselona futbol klubu əsas stadionu Kamp Nounun yenidənqurma işlərində yaşanan gecikmələr səbəbindən ehtiyat addım atıb.
AzerVoice xəbər verir ki, Kataloniya nəhəngi rəsmi şəkildə Montjuicdə yerləşən Estadi Olimpic Lluis Companys stadionundan 2025-ci ilin fevral ayının sonuna qədər istifadə etmək üçün müqavilə imzalayıb.
Yeni razılaşma Barselonaya Çempionlar Liqasının ilk mərhələsində və mümkün pley-off oyunlarında eyni stadionda çıxış etməyə imkan verəcək. UEFA qaydalarına görə, klublar turnir mərhələsi boyunca vahid stadionda oyun keçirməlidir.
Klub son iki mövsümdə Kamp Nounun təmiri səbəbindən ev oyunlarını Montjuic stadionunda oynayıb. Lakin Şəhər Şurasının iyulda verdiyi qərarla İlkin İstismar Lisenziyası təsdiqlənmədiyi üçün Kamp Nouda avqustun 10-na planlaşdırılan Joan Gamper Kuboku keçirilə bilmədi.
Kamp Nouya dönüş klub üçün təkcə idman baxımından deyil, həm də iqtisadi baxımdan həyati əhəmiyyət daşıyır. Yenilənmiş arenanın 62 min nəfərlik tutumu Montjuic-in 50 minlik tribunalarından xeyli böyükdür. Bu fərq Barselonanın gəlirlərinə birbaşa təsir edir. Klub həm maliyyə sabitliyini qorumağa, həm də UEFA qaydalarını pozmamaq üçün alternativ variantlardan yararlanmağa çalışır.
Razılaşma yalnız avrokubok oyunlarını əhatə etsə də, La Liqadakı bəzi matçların yeri hələ də açıq qalıb. 14 sentyabrda keçiriləcək Barselona – Valensiya görüşü Montjuic-də Post Malone konsertinə görə baş tutmayacaq. Klub oyunu ya azarkeşsiz Camp Nouda, ya da alternativ olaraq Gironanın Montilivi stadionunda oynamaq imkanlarını nəzərdən keçirir. Espanyol stadionu isə variantlardan kənarda saxlanılıb.
Montjuic təpəsində yerləşən Estadi Olimpic 1929-cu ildə Beynəlxalq Sərgi üçün inşa olunub, 1992-ci il Olimpiya Oyunları üçün isə yenidən qurulub.
