BAKI, AzerVoice, Fərid Mikayılov
Portuqaliyalı ulduz Kriştiano Ronaldonun Avropada futbol oynamaq ehtimalı çox zəifdir.
AzerVoice xəbər verir ki, bu barədə onun Mançester Yunayteddəki keçmiş məşqçisi Rene Meulensteen açıqlama verib.
Hazırda Əl-Nəsr klubunda çıxış edən Ronaldo yeni müqavilə ilə daha iki il Səudiyyə Ərəbistanında qalacaq.
2023-cü ildə Mançester Yunaytedlə müqaviləsinə son verilən Ronaldo, Səudiyyə Ərəbistanına keçərək yeni dövrün başlanğıcını qoymuşdu. Daha sonra digər dünya ulduzlarının da Pro Liqaya gəlişi ilə çempionat tanınmağa başladı.
Ronaldo bu günədək ardıcıl “Qızıl buts” mükafatları qazanaraq yüksək performansını davam etdirib. Yeni müqavilə isə onu 42 yaşına qədər Əl-Nəsr-də saxlayacaq. İddialara görə, Avropaya qayıdış ehtimalı olsa da, klubların onun maliyyə şərtlərini qarşılamaq istəyi yoxdur.
Meulensteen əlavə edib ki, Ronaldonu Səudiyyədə saxlayan yalnız pul deyil, həm də Asiya Çempionlar Liqasında oynamaq imkanıdır. Bu, eyni zamanda onun Portuqaliya millisində forma geyinməsini də təmin edir.
Əl-Nəsrdəki çıxışları ilə hələ də məhsuldar olan Ronaldo, Portuqaliya millisində yerini qoruyur. O, növbəti Dünya Kubokunda iştirak etmək və karyerası boyunca 1000 qol hədəfinə çatmaq niyyətindədir.
