BAKI, AzerVoice, Nailə Babazadə

Səudiyyə Ərəbistanında keçiriləcək 6-cı İslam Həmrəyliyi Oyunlarında Türkiyə 110 qadın və 102 kişi olmaqla ümumilikdə 212 idmançı ilə medallar uğrunda mübarizə aparacaq.

AzerVoice xəbər verir ki, İslam Əməkdaşlıq Təşkilatına (İƏT) bağlı İslam Həmrəyliyi Oyunları Federasiyası (ISSF) tərəfindən dörd ildən bir təşkil edilən yarışların 6-cı mərhələsi 7–21 noyabr tarixlərində paytaxt Ər-Riyadda baş tutacaq.

Rəsmi açılış mərasimi 7 noyabrda keçiriləcək, lakin oyunlar bu gündən — voleybol və futzal qarşılaşmaları ilə başlayır.

Türkiyə nümayəndə heyəti yarışlarda 20 müxtəlif idman növündə — atletika, para atletika, basketbol (3x3), boks, qılıncoynatma, kibersport, güləş, ağırlıqqaldırma, para ağırlıqqaldırma, həndbol, ju-jitsu, cüdo, karate, stolüstü tennis, muay-tay, taekvondo, duatlon, voleybol, vuşu və üzgüçülük üzrə mübarizə aparacaq.