ABŞ ilə İran arasında davam edən müharibənin Səudiyyə Ərəbistanı, Qətər və Birləşmiş Ərəb Əmirliklərinin ABŞ ilə elan etdiyi təxminən 4 trilyon dollarlıq iqtisadi əməkdaşlıq planlarının həyata keçirilməsini çətinləşdirə biləcəyi bildirilir. Bu barədə Peterson Beynəlxalq İqtisadiyyat İnstitutunun yeni təhlilində qeyd olunub.
ArabAZ xəbər verir ki, 15 səhifəlik hesabatda Körfəz ölkələrinin müharibə fonunda artan iqtisadi təzyiqlə üzləşdiyi vurğulanıb. Təhlilə görə, müdafiə xərclərinin yüksəlməsi, enerji infrastrukturunun qorunmasına əlavə vəsait ayrılması və ticarət yollarında yaranan problemlər həmin ölkələrin maliyyə imkanlarına təsir göstərir.
Hesabatda əsas diqqət Səudiyyə Ərəbistanı, Qətər və BƏƏ-nin ABŞ Prezidenti Donald Trampın “Öncə Amerika” siyasəti çərçivəsində Vaşinqtonla elan etdiyi iqtisadi razılaşma və sərmayə öhdəliklərinə yönəldilib.
Təhlilə əsasən, Körfəz ölkələrinin təhlükəsizlik və enerji infrastrukturu üçün daha çox vəsait xərcləmək məcburiyyətində qalması ABŞ ilə nəzərdə tutulan iri həcmli sərmayə və iqtisadi layihələrin həyata keçirilməsi imkanlarını zəiflədə bilər.
Müharibənin regional enerji və ticarət marşrutlarına təsiri də Körfəz iqtisadiyyatları üçün əlavə risk yaradır. Xüsusilə enerji ixracı və beynəlxalq ticarət yollarının təhlükəsizliyinin təmin olunması üçün xərclərin artması dövlətlərin maliyyə prioritetlərini dəyişə bilər.
Peterson Beynəlxalq İqtisadiyyat İnstitutunun təhlili göstərir ki, uzunmüddətli hərbi qarşıdurma Körfəz ölkələrini ABŞ ilə iqtisadi tərəfdaşlıq çərçivəsində götürdükləri öhdəliklərlə regional təhlükəsizlik ehtiyacları arasında seçim etməyə məcbur edə bilər.
