BAKI,AzerVoice
Türk Mədəniyyəti və İrsi Fondunun prezienti Aktotı Raimkulova Türküstan şəhərində keçirilən və hüquqşünaslar, filosoflar, tarixçilər, hüquq ekspertləri, təhsil işçiləri və vətəndaş cəmiyyəti nümayəndələri də daxil olmaqla 300-dən çox iştirakçını bir araya gətirən «BÖYÜK ÇÖLÜN FƏLSƏFƏSİ VƏ HÜQUQ ƏNƏNƏSİ» başlıqlı BEYNƏLXALQ SİMPOZİUMUNDA çıxış edib. Simpozium elmi fikir mübadiləsi, müasir hüquq ənənəsinin təhlili və türk dünyasının ortaq hüquq-fəlsəfi mirasının müzakirəsi üçün mühüm platforma kimi dəyərləndirilib.
AzerVoice xəbər verir ki, Aktotı Raimkulova öz çıxışında türk mədəni ənənəsinin fundamental dəyərləri olan mənəvi birlik, humanizm və ədalətin əhəmiyyətini vurğulayıb, həmçinin müasir dövlət idarəçiliyi modellərində öz əksini tapmış hüquqi norma və prinsiplərin tarixi ardıcıllığına toxunub. O, Fondun türk dövlətləri arasında mədəni-humanitar əməkdaşlığın möhkəmləndirilməsi istiqamətində görülən işləri vurğulayıb.
Konfrans çərçivəsində Qazaxıstan Respublikası Konstitusiya Məhkəməsinin sədri Əzimova Elvira, Azərbaycan Respublikası Konstitusiya Məhkəməsinin hakimi Rəşid Rzayev; Türkistan vilayəti Akim müavini Ertay Altayev, Beynəlxalq Qazax-Türk Universitetinin Qəyyumlar Şurasının rəhbəri Muhittin Şimşək, Qazaxıstan Respublikası Parlamentinin Məclis deputatı Unzila Şapak, Qazaxıstan Respublikasının Xarici İşlər Nazirliyinin xüsusi tapşırıqlar üzrə səfiri Alua Nadirkulova, Türk Akademiyasının vitse-prezidenti Bülənt Bayram, Türk Dövlətləri Təşkilatının nəzdində Türk Dövlətləri Qadın Sahibkarlar Şurasının sədri Lazzat Ramazanova konfrans iştirakçılarına salamlama nitqi ilə müraciət ediblər.
Konfransın panel iclası Xoca Əhməd Yəsəvi adına Beynəlxalq Qazax-Türk Universitetinin rektoru Janar Temirbekovanın moderatorluğu ilə baş tutub. Universitetinin tələbə və professor-müəllim heyəti üçün aparıcı alimlərin qonaq mühazirələri təşkil edilib.
Simpozium türk dövlətləri arasında elmi inteqrasiyanın, mədəni və hüquqi əməkdaşlığın gücləndirilməsi baxımından mühüm platforma kimi dəyərləndirilib.
