BAKI,AzerVoice

NATO-nun baş katibi Mark Rutte Milad bayramı (Krismás) ərəfəsində Ukraynaya dəstəyin davam etdirilməsinə çağıraraq, eyni zamanda alyansa üzv Avropa ölkələri üçün təhlükəsizlik riskləri barədə xəbərdarlıq edib. AzerVoice xəbər verir ki, Rutte Almaniyanın DPA xəbər agentliyinə verdiyi açıqlamada bildirib ki, Rusiya prezidenti Vladimir Putin-in NATO-ya üzv hər hansı bir ölkəyə hücum etməsinin qarşısını almaq üçün Ukraynanın güclü qalması təmin edilməli, eyni zamanda NATO-nun Haaqa sammitində qərara alındığı kimi müdafiə xərcləri artırılmalıdır.

“Əgər bu iki addımı atsaq, özümüzü müdafiə etmək üçün kifayət qədər güclü olarıq və Putin heç vaxt belə bir cəhdə əl atmağa cürət etməz”, – deyə Rutte vurğulayıb.

Əvvəllər Niderlandın baş naziri vəzifəsini tutmuş Rutte qeyd edib ki, müdafiə qabiliyyətlərinin gücləndirilməsi prosesi sürətlə həyata keçirilməlidir. Onun sözlərinə görə, müxtəlif kəşfiyyat qurumlarının qiymətləndirmələri göstərir ki, əgər bu sahədə addımlar atılmasa, vəziyyət 2027, 2029 və ya 2031-ci ildən etibarən təhlükəli mərhələyə keçə bilər.

Rutte həmçinin bildirib ki, hazırda Putin dövlət büdcəsinin 40 faizdən çoxunu silahlanmaya xərcləyir. O əlavə edib ki, Ukraynada davam edən müharibə Putinin təxminən 1,1 milyon insanı qurban verməyə hazır olduğunu nümayiş etdirib ki, bu da Rusiya tərəfinin ölən və yaralananlarının sayına dair mövcud qiymətləndirmələrə işarədir.